小可複雜个嫁娶關係

「後某[āu-bóo]」卡雅氣个講法是「後岫[āu-siū]」。例：「某儂前某死早，伊才閣娶一个來做後岫。」前某个後頭厝，有時會認即个本來無關係个後某當做家治个查某囝，按呢號做「接跤[tsiap-kha]个查某囝」，這扑算是出自一種向望伊愛thiànn-thàng前儂囝（亦著是家治个外孫）个心情。

「爸仔接母仔」[pē-á tsiap bú-á]、「母囝對爸囝」[bú-kiánn tuì pē-kiánn]、「母仔對爸仔」[bú-á tuì pē-á]。即三種講法意思共款，著是本來攏有囡仔个兩个家庭，一爿死某，一爿死翁，鰥夫[kuan-hu]佮寡婦相伨親[sio thīn-tshin]，而且兩爿个前儂囝[tsîng-lâng-kiánn]（若拄好一爿是查埔，一爿是查某）嘛予怹定親、結婚。

現代連續劇（台灣、日本攏有）定定咧做講，相意愛个一對少年儂，怹爸母若互相閣嫁娶，少年情侶[lū]煞變做兄妹，袂凍閣結婚，哀怨一世儂。即種代誌，古早顛倒無禁忌[kìm-khī]，共款會使幸福過一生喔。^^

若「繼父[kè-hū]；繼母[kè-bió]」口語是「後爸[āu-pē]、後叔[āu-tsik]；後母[āu-bú/bó]、後娘[āu-niû]」。

當面稱呼後母，若共款叫阿母、媽媽，按呢是卡親。嘛有老爸交代、或者是後母家治先講叫阿嬸[a-tsím]著好（阿姨[a-î] 應該嘛會使）。總是，一儂一家tāi，公媽隨儂tshāi。逐口灶按怎叫喙[kiò-tshuì]个慣勢無仝。像阮阿公叫親老爸（阮阿祖）是叫 án-tsik--á。

亦有一種叫做「姑換嫂[koo-uānn-só]」，雙方个兄妹互相嫁娶，親--上加親。但是俗語講「姑換嫂，無thang好」，這是啥因端[in-tuann]？無聽過、無了解个朋友，請家治網路查看覓。

閣一種我一時袂記得矣，另工想著才補 :-)