尪公、尪媽

台北四箍圍个山區，祖籍是福建安溪个百姓，怹有服侍「保儀尊王」佮「保儀大夫」。即兩尊神明个來歷，上普遍个講法是唐朝个張巡佮許遠，怹兩儂佇安史之亂个時，死守睢陽[Sui/Tsui-iông]，忠義參天，後儂才奉怹做神來祭拜，成做茶業、礦業个守護神。全台灣有一千外間怹个廟。

遮个故tāi 有袂少是非[sī-hui]爭論，tann 特別來講百姓對「保儀尊王」个俗稱是「尪公 Ang-kong」，伊个家後，百姓叫做「尪媽 Ang-má」。「尪」本義是偶像[ngóo-siōng]，引申表示「神明」。

傳說 尪公足疼惜尪媽，不管時攏佇尪媽个身軀後保護伊。迎尪公个時，「尪媽」个大輦[tuā-lián]著愛排做前，若轎班無細膩將尪公扛對頭前去，神轎即時會家己擋恬，眾儂 sian扛嘛扛袂振動，的確愛等到尪媽閣行進前，尪公轎才有法度閣起行。

所以才有一句俗語：「尪公聖，毋值尪媽定」[Ang-kong siànn, m̄-ta̍t Ang-má tiānn]。這也用來解說，女神一般比男神較興[hing]，親像媽祖婆對大道公、桃花女對周公。若是佇人情世事，可比頭家講个無準算，最後著聽頭家娘个，也通提即句俗語來講。

咱看正史个記載，當年張巡受困佇小小个睢陽城內，別位个官軍足惡質，毋肯出大軍來救。致使睢陽个百姓，有毛个食到粟鳥仔、老鼠；無毛个khè到死儂骨頭。最後張巡嘛共伊个細姨刣來予軍兵食，城中予儂刣來食个老幼婦女，到欲三萬儂！

假定民間所拜个尪公、尪媽，就是張巡佮伊个細姨，按呢「尪公聖，毋值尪媽定」个傳說，咁是民間借這，暗中替即个細姨抱不平[phāu-put-pîng]、喝[huah]毋願？