「巨蛋」个台語

陳菊市長佇高雄巨蛋[kī/kū-tān]用台語致詞，做好樣予咱社會看，顯明台語會凍應用佇正式場合。無疑悟一句「大粒卵 tuā-lia̍p-nn̄g」致到即款好意烏有去，甚至閣加強社會迄種「台語粗俗低路」个錯誤觀感。

若是「下底層」个民間號名習慣，即種外來个新事物，會音譯做 tòo-muh（語源就是英語 dome），無咧管汰伊華語按怎講。但是即个「巨蛋 」是對「頂峘層」个官方佮媒體向下傳播个物件，台語百姓無發言權，也無自信建立家己个用語。

杜建坊先生有提議，採用台語个在來詞「圓拱(圓光) uân-kong」來共伊號做「圓拱館 uân-kong-kuán」，抑是「圓拱埕 uân-kong-tiânn」。

杜先生討論个文章佇遮：〈台北捷運「小巨蛋站」台語按怎講？〉（註：後來杜先生共伊个網誌關起來矣。無彩。）

咱愛爭取台灣儂用母語發言个權利，毋但是向統治者爭取，閣卡重要个是向家己「心肝內个警總」爭母語發言權。現代台語儂，無分老儂囡仔，對待新事物，攏佮意講華語，無愛講台語。我佇頂面列出「kī/kū-tān、tòo-muh、uân-kong-kuán」各種講法，予儂利用，是表示講台語欲號名，無為難；但是欲叫台灣儂有自覺、肯採用，足艱難。