巴克禮牧師聖經个台語風格

以下我對巴克禮牧師白話字聖經个觀感，愛閣好好仔稽考[khe-khó]：

巴牧師佇府城教會報所寫个台語文，讀起來較自然；但是伊翻譯个聖經，句讀[kù-tāu] 就無遐自然。

因為伊不止致意，著愛按照聖經原文忠實翻譯，結局翻出來个話句、語法佮當時儂寫个閩台語白話字文章來比，離咱慣勢个台語愈遠。

致使現代台灣儂，尤其是欠缺長老教會背景个儂，家己讀抑是聽儂讀伊个白話字聖經，定定歹理解。

咱thang做一種實驗：平平是成百年前个語言，用當時个英文來翻譯个聖經，讀予當今个英語儂聽；比提巴牧師聖經讀予當今个台語儂聽。佗一種儂聽起來較自然？我相信是英語儂。即款實驗，若欲量化，著愛斟酌設計。

這除了頭前所講个原因以外，當然閣有一寡重要因素：

一、台語淪亡速度傷緊，真濟講法、句式失傳去。現代台灣儂所知影、所慣勢个，是無tsiâu-tsn̂g、li-li-lak-lak 个台語。

二、台語儂自來無機會透過教育佮文字，來接觸佮學習較古早个台語，所知个攏是演變到現此時个台語講法。