《廈門音新字典》个研究

台師大台文所 杜向榮 碩士論文 全文下載「《廈門音新字典》研究」。

引用 Khu Úi-him 先生對即本論文个紹介：

『下面連結beh hām逐家分享ê是杜向榮先生－杜建坊老師ê後生－ê碩士論文。伊ê研究題目是「廈門音新字典研究」，伊指出廈門音新字典內底錯誤koh不只仔濟。Góa認為這是值得咱來好好仔研究，討論，「廈門音新字典」影響誠闊mā誠大，伊mā無完全符合lán chit-má leh 講ê台語。』

---

即本論文，我猶未詳細看，諒必有真濟值得參考个內容。以下先簡單講我對甘字典个印象：

一、甘字典上大个問題，是內文校對無精，錯誤百出，重印無數擺，罕得修正。因為內底異體字足濟，咱比較伊對異體字个仝款解說，就會發現有真濟是校對問題。

二、當年个閩台語字書編輯者，延續漢文先生个傳統佮智識，只有「讀冊音」（讀古文）佮「土音」个概念，土音有个是現代學者所謂个「白讀」有个是「訓讀」，甘字典將「白讀」佮「訓讀」濫做伙，這只是當時个常例，咱毋通用現代个學術水準來否定伊，講伊是「錯亂」，上加會用得講是「前修不密」。

三、即本論文，冊皮日期 2009 年 五月，討論个是舊版甘字典，但是重新整理、扑字排版个《甘為霖台語字典》出版日期是 2009 年 四月。所以即本論文一下出來，就小可仔過時矣，著愛閣將新个甘字典提來比對，才有圓滿。

四、話講倒轉，新版个甘字典，恐驚也是錯誤百出……。到底啥儂重整理个，也無佇新版冊裡徛名，表示負責。