【性騷擾】个台語

有朋友咧問性騷擾[sìng-so-jiáu]个台語講法，我來寫--寡，請各位指教。

一、戲弄[hì-lāng]，真濟儂唸做 hí-lāng（佮【喜弄】仝音）。

文例：有一陣破少年佇巷仔戲弄放學欲轉[tńg]个女學生。

二、膏膏纏、米糕𣻸[bí-ko-siûnn]。

文例 1：叫伊毋通閣來膏膏纏，講袂聽！
文例 2：汝若閣走來對阮查某囝米糕𣻸，跤骨就共汝扷[ió]--斷！

三、起魔公[khí môo-kong]：形容一个儂獸性發作。【魔公】是比喻狎褻[ap/a̍p-siat]、邪淫[siâ-îm]个查埔。這比【起鵤 khí-tshio】閣較嚴重。查埔起性欲，叫做【起鵤】；查某起性欲，叫做【起嬈 khí-hiâu】。

四、偷摸奶[ling/lin/ni]。

文例：俗語講：【偷摸奶[ling]，罰三千[tshing]】。今[tann]物資浮動[phû-tōng]，汝若起魔公去蹧躂--儂，著賠儂五十倍、一百倍才會直。

五、狗鯊[káu-sua]：一種鯊魚，頭細尾長，也叫做【狗母鯊 káu-bú-sua】。可能因為性質好淫[hònn-îm]，所以也借來比喻性騷擾个歹儂个行為。

文例 1：某儂若啉--幾杯仔，連鞭就開始起狗鯊。
文例 2：迄个少年寡婦無所靠，庄裡有不死鬼去共伊弄狗鯊[lāng káu-sua]。
文例 3：某儂一隻哪虎頭豬哥咧，不時咧佮婦人儂狗鯊。
（【虎頭豬哥】是豬哥中个極品[ki̍k-phín]，時常用來比喻好色男。【狗鯊】thang直接做動詞用）

六、痟豬哥[siáu-ti-ko]、痟貓[siáu-niau]：時常用來比喻儂，也thang做動詞。

文例 1：痟豬哥上興[hìng]即味个！
文例 2：汝即个閣咧痟豬哥矣！
文例 3：迄隻痟貓歸暝佇 phah-buh (Pub) 覓[bā]查某，天光才轉來。
文例 4：萬不一佇學校拄著有儂共汝痟貓，著愛緊去報告老師。

七、草踏[tsháu-ta̍h]：（動詞）蹂躪[jiû-līn]、強暴[kiông-pō]、性侵害。
（「暴」个正字音是 pō，俗音 po̍k）