林祥雲先生佇伊个台語白話字著作[tù-tsok]《Sêng-gú Chi̍p》（成語集）內底解說「枵雞毋惜箠，枵儂毋惜面皮」[iau-ke m̄ sioh tshê/tshuê, iau-lâng m̄ sioh bīn-phê/phuê]，講：
「雞若枵，毋驚竹箠扑趕；儂若枵，毋驚體面[thé-biān]見笑。
這是講，儂著骨力趁食；若無，到枵餓[iau-gō]迄時，就無顧臉面[lián-biān]，無惜廉恥[liâm-thí]。」
（原冊攏寫教羅，佇遮轉做漢字，注台羅）
伊解說个話語簡捷[kán-tsia̍t]端的[tuan-tiah]，意思賅括[kai-kuat]警省。咱通看出，伊个用詞佮咱現代台語儂生活中慣勢講个台語無仝，顯出一種卡正式、典重[tián-tiōng]个風格。
佇「毋驚竹箠扑趕」，咱扑算會講「毋驚箠仔扑佮趕」。「到枵餓迄時」，咱扑算會講「到枵甲擋袂椆个時」，而且真濟儂已經毋知台語「枵 iau」佮「餓 gō」攏有，而且意思有分。「枵」是英語 hungry，「餓」是 starve。
並毋是咱自細漢攏講台語，咱就會曉得「完整个台語」。作田儂卻然毋知影討海儂个話，扑鐵个毋知影木匠[ba̍k-tshiūnn]个話。閣再咱多數五六十歲以下个儂，一生所講个台語，只不過是簡化个生活對話，咱袂曉得完整个教育台語、醫療台語、祭典台語、音樂台語……。專業个用語且無論，進階个文化台語，親像林先生所寫个台語話，咱嘛袂曉得。
所以咱著珍惜遮个台語文獻，將失落个台語加減仔抾一寡仔轉來。
補充：
一、囡仔歌、褒歌民謠、俗諺語，口耳相傳，一世代傳過一世代，一所在湠過一所在，會產生足濟「版本」真正常，而且嘛無「著作權」，所以咱家治欲應用來講話、寫作，thèng好隨意來變化。
二、但是徛佇學習、保存古早話个立場，我是用「捨己從人」个心態，毋愛干焦照家治个語感，輕易來評判文獻个記載。語料、文獻盡量ke收、ke看，了後持平來比較、思考，望欲楦[hùn]闊家治个眼界。
像1914年个《台灣俚諺集覽》有收「iau-koe m̄ ùi chhê」（枵雞毋畏箠）；1928年出版，但是1908左右就寫好个《成語集》所收是「iau-ke m̄ sioh chhê, iau-lâng m̄ sioh bīn-phê」（枵雞毋惜箠，枵儂毋惜面皮）；1931年《台日大辭典》是收「iau-koe m̄ sioh chhê, iau-lâng m̄ kò͘ bīn-phê」（枵雞毋惜箠，枵儂毋顧面皮）。
將遮个資料排比起來，咱thang知：
一、「毋畏、毋惜、毋顧」是古早真四常个句法，咱毋通用現代个語感講：「伊毋著，愛改做『無畏、無惜、無顧』才是正確个台語」。「毋」現代用法，一般攏表示意願上毋肯，但是古早常在用佇單純否定，目今即種用法，干焦殘留佇「毋是、毋好、扑毋見」幾个仔固定講法爾爾。連「扑毋見 phah-m̄-kìnn」嘛早就合音做兩个音節 phàng-kìnn（變體真濟）。呂柳仙勸世歌有唱講：「儂个尾溜看毋見，圓--儂會扁 扁會圓。」[lâng ê bué-liu khuànn-m̄-kìnn, înn--lâng ē pínn, pìnn ē înn.]
二、「毋惜箠」个「惜」，毋是現時咱所想个「愛惜」迄種「惜」，按呢解說袂通。顛倒卡接近文言「不惜一戰」迄種「不惜」，「毋著箠」是「不惜受箠楚之苦」。
(Facebook )
Comments powered by Disqus.