我欲共伊放生

我出外食頭路，家己稅一間公寓咧徛，一个同事佮怹女朋友蹛對面間。怹欲搬走矣，我暫時閣蹛咧。

我去買一尾冷凍个魚仔轉來，按算隔工欲煮。魚身厚厚肥肥，魚尾短短，規尾已經堅凍，變做弦月形。

我一下共迄尾魚囥落去空空个水槽仔內，伊沐[bak]著一點仔水分，煞隨時退冰，規尾閣活起來，phiat8咧phiat8咧，喙笑目笑真歡喜。

我看著伊按呢，雄雄一陣心酸對心肝底溢起來，我放聲大哭，手哪挼[juê]目睭，哪講：「我欲共伊放生！我欲共伊放生！……」

就按呢我精神過來，目箍澹澹、鼻空口有鼻水。

可能是最近時常看著阮媽媽咧食魚。