台語文捷讀著个兩个詞：所擺、雖罔

【台語文捷讀著个兩个連接詞：sóo-pái（所擺）、sui-bóng（雖罔）】

sóo-pái

sóo-pái 是阮南部用語，就是「所以……」个意思，對屏東到台南攏有儂講。 阮遮屏東萬丹有講 sóo-pái 也有講 sóo-mái。即个 pái / mái 語素本身按怎解說， 我無把握。sóo-pái 毋是教會用語。sóo-pái 漢字一般寫做「所擺」。

文例：”sóo-pái” 即个連接詞阮遮不時聽會著父老鄉親咧講，𪜶無教會背景。 另外一方面，教會公報完全毋捌出現過即个詞。所擺我判斷 “sóo-pái” 毋是教會用語。

sóo-pái 表示「所以」个意思，台灣中北部鄉親無咧講个款？ 過去个台語辭典我一時也揣無有誌載[tsì-tsài]，教典目前也無收。

臺日大辭典有收 sóo-pái，漢字伊寫「數回」，意思伊解說講是「每擺、見擺、逐擺」， 即種意思佮阮个用法無仝。

sui-bóng

sui-bóng 是廈門話，就是「雖然……」个意思。廈英大辭典就有收， 台灣長老教會人士也捷捷用著，教會公報有 780 篇寫著！ 但是臺日大辭典無收 sui-bóng，阮細漢个時也毋捌聽過， 可見台灣非教會人士罕用。（教會公報有 3662 篇寫著 sui-jiân， 可見 sui-jiân 比 sui-bóng 捷用太濟咧。）

不而過，臺日新辭書(1931)就有收「雖罔」，編者東方孝義長期佇台灣 做警察佮法院通譯，伊接觸面闊，真有機會聽著教會人士講著即个詞。

sui-bóng 个 bóng 就是「老 bóng 老，閣會哺塗豆」个 bóng， 意思就是「老 雖然是 老，閣會哺塗豆」，只是咱台灣一般鄉親罕得將 sui 佮 bóng 結合做一个同義複詞來用。sui-bóng 漢字一般寫做「雖罔」。

「雖罔」佇《闽南方言大词典》p.233 有收，伊標明是廈門話佮漳州話， 伊收兩个義項，第一義就是「雖然」；第二義是漳州才有，但是後壁著加「仔」 講做「雖罔仔」，意思是〔馬馬虎虎〕，伊个例句：「这代志虽罔仔啰好」。

（補充：閩方典所收个「雖罔仔」，我臆，可能是「隨罔仔」。「罔」佇遮是 「將就、姑且」个意思，「隨」就是「隨便、隨意」，按呢鬥起來才有 「má-má-hu-hu、隨便將就一下」个意思。）

結論

以上兩个詞透過無仝背景个台語文界人士（包括身兼教會儂佮南部儂--者） 引進台文當中，成做台語文學習者不時讀會著个詞。 因為毋是通行佇全台灣社會个台語詞，所擺不時有儂問起。 總--是，即兩个詞本底是通行佇無仝所在佮領域，咱會使按呢講：

「雖罔」是廈門話，透過教會傳過來台灣，本底是教會人士較捷用； 若是「所擺」就毋是教會用語，主要是通行佇台灣南部。 現代台語文運動開始了後，即兩个詞漸漸也成做台語文个常用詞矣， 這也是充實台語詞彙庫个好法度。

另外一方面，咱也毋通因為台語詞「雖然」、「所以」佮華語講法仝款， 就毋敢、歹勢佇台語文內底用著，想講著愛寫佮華語無仝个詞「雖罔」、 「所擺」才是有台灣味、有台語特色个台文。台文个媠，免的確著靠這 來表現。落配插[lo̍h phuè-tshah]是好，若一篇長文自頭至尾全部攏用 「雖罔」、「所擺」也無影就是好風格个台語文。