扑死一堆蠓

頂日仔借蹛佇一位清幽个民宿，四圍樹木花草種真濟。暝尾仔起來便所，看著一隻蛾仔佇房間內，翼仔無啥力，phiat8咧phiat8咧。

好心將窗仔扑開一縫仔欲予伊飛出去，伊猶原飛袂出去--無打緊，煞飛兩隻蠓仔入來。我佇即个關重个時刻，煞來起戇想，連房門嘛扑開，想欲hiam3蠓仔出去。

袂直啦！幾若十隻枵鬼蠓佇幾秒鐘內做一下傱[tsong5]入來，親像蜈蜞咬蛤[ngoo5-khi5 ka7 kap] 共我圍攻。

想無步，姑不將，一隻一隻共伊扑死。蠓仔佇我个手蹄仔佮跤腿予我扑甲碎糊糊，有个身屍佮我个紅血濫做一ko5，有个只賰烏烏个痕跡[hun5-jiah]。

我長期不殺生，其實是因為生活條件會得配合，所以才勉強做落去，但是也定定會佇浴間仔淹死蚼蟻，總--是，幾十年來，毋捌按呢大開殺戒。

愈活愈倒thuann5，道心已經消磨了了，佇即个世間度日，實在真無局。無論是世俗个享樂，抑是修行个法喜，雙頭無一ngauh。