扑麻雀个風俗

本文

無論本省、外省家庭攏有儂會扑麻雀，毋過，我細漢个印象，外省家庭暗時閒閒較愛扑麻雀，本省儂一般家庭平常時仔較罕得咧扑麻雀，新正年頭才特別「開放」幾工仔予厝內大細漢扑麻雀、跋筊（賭博）。當然，逐口灶情形無仝，我个印象袂憑準[pîn-tsún]--得。

若講到阮兜个家教，彼是siat-thái-á嚴，一年365工，任何時陣攏不准跋筊，連「正常娛樂」無跋錢个著棋[tioh-kî]、奕 khe-tsí-báng（西洋紙牌）都袂使。阮阿公教阮老爸、阮老爸教阮，一代過一代个教示就是按呢。

（siat-thái、siat-thái-á，程度副詞，「非常、極其」个意思。）

國小个時，有一擺，我走去阮鄉裡國民黨民眾服務中心𨑨迌，遐有棋盤，有儂招我耍車馬砲暗棋，行到一半，拄千[tú-tshian]阮老爸來遮毋知欲揣啥儂，伊看著我，表情小可仔各樣[koh-iū]，輕聲仔問講：「汝咧耍這喔？」

了後我戇戇轉去厝裡，袂直啦！我入門到tè，伊就攑箠仔一直扑我个手蹄仔，共我修理甲金sih-sih。我即陣想起來，敢哪無印象捌先聽過伊吩咐講，連即種都袂使耍--得。

宋楚瑜平時有咧扑麻雀做藝量[gī-niū]，這是通儂知个代誌，伊家己也捌公開提起。不過，2004年連戰佮伊兩个搭檔，選輸陳水扁，國、親兩黨毋願，發動抗議。李登輝公開講，有儂抗議了後，走轉去扑麻雀，引起宋楚瑜大不滿，講是咧影射中傷--伊，宋楚瑜後來告贏李登輝，得著兩百萬賠償金。

石牧民
我的家風kap老師有成。我到今袂曉麻雀，會使講摸mā無摸過⋯

潘科元
我高中去台北，高三就變歹囝，學會曉扑麻雀囉。

石牧民
哈哈，大學tī新莊suè厝，暗時隔壁間攏扑麻雀--ê聲。有一暗，in窗仔門扑開，是低我一年--ê學生，看著我，竟然毋是講，「學長，要不要一起玩？」煞講，「學長，對不起。」XD

潘科元
好囝阿民學兄！

Liz Lim
我完全是顛倒反，跋筊的，毋但麻雀，可能除了天九袂曉賰的攏會曉。

潘科元
家庭環境？

Liz Lim
著，老母彼爿，家庭背景有較亂，所以我真細漢就開眼界XD　毋過講起來我足懷念彼幾冬佇彼个「無正常」的環境所看著、學著的，是我足寶貴的人生經驗。有的閣那連續劇咧，有夠精彩，而且我嘛無變做歹囡仔。

潘科元
我欲學歹囝都無才情^^

Liz Lim
講按呢XDD

柳青
看恁的對話，足緊張的！

Liz Lim
是按怎??

Chihlu Huang
喔喔喔“天九牌”是我囡仔時的記持 ^O^
阮兜以早（！！）攏耍 “天九牌” （kong3-tsiong）

Liz Lim
阮兜有一副，毋過我袂曉奕，看大人兩支兩支掀牌，我叫大人共我教，無人欲教我！

柳青
細漢看大人佇暗摸摸的房間內跋筊，田裡穡頭攏毋做，會予害死喔！

林文信
咱台語有一个語詞，假pâu就是對密實仔ba̍t-tsa̍t-á來兮
天九牌阮遮講密實仔

Yuning Tsai
同你說的家族內麻將是被禁止的，就連撲克牌都不行

蕭平治
扑『麻雀』掠『麻雀』我ē-hiáu，扑麻雀jí-á bē-hiáu。

張翠苓
阮哥哥攏用家己做的「鳥phiak-á」phiak tshik 鳥仔
蕭平治老師…請教一下…「鳥phiak-á」正確的講法是啥？

蕭平治
阮講樹奶phia̍k-á。

張翠苓
啊！著啦。
就是樹奶phia̍k-á
多謝呢…我記持有夠bái

林文信
阮遮講phiak-á篙ko，我攏家己做，用菝仔樹的樹椏做篙身，用自轉車的內胎做樹奶帶仔，phiak-á篙我做徦真媠，但毋捌彈tuānn徦半隻鳥仔，毋是無去彈鳥仔是攏彈袂著

劉建仁
khe1-tsi2-bang2/the1-dzi2-bang1<日語ページワン(phe5-dzi2-uang2)<英語 page one(紙牌的一種耍法)。