「技」个台語音

【技術】【特技】【科技】現代台語儂普遍唸做 ki-su̍t、ti̍k-ki、kho-ki，「技」本調第一聲。也有寡少年儂綴華語聲調，唸做 kì-su̍t，甚至有袂曉得个台語評審也講著按呢唸。

「技」，中古音有「渠綺切」陽上第六聲，佮「奇寄切」陽去第七聲 兩音。

「技」，泉腔《彙音妙悟》(1800) 收佇陽上聲 kǐ。

漳腔《雅俗通十五音》(1818) 收佇陽去聲 kī，但是也有陽平 kî 第五聲个讀法，漳腔《福建方言字典》(1832) 仝款收陽去 kī、陽平 kî 兩音。

因為漳腔無陽上，若是文讀音全濁上聲，是佮陽去合併，所以漳腔「技」唸陽去，佮泉腔唸陽上，系統上閣對應會起來。也就是講，雖然中古音有收陽上佮陽去，但是就閩南話个立場來看，將古閩南話擬音做陽上聲，按呢較一貫。總--是，漳腔「技」閣唸第五聲，就較 koh樣。

開始看著「技」唸第一聲 ki 个文獻，目前我有看著 1885 光緒11年12月 台灣府城教會報，有寫著「ha̍k-būn ki-gē」（學問技藝）；另外 1896 光緒22年3月 漳泉聖會報 有寫著「chè-chō ki-gē」（製造技藝）。

按呢「技」脫離古音，發展出第一聲个唸法，差不多是佇十九世紀中期開始傳--開个。原因我臆，就是「技」佮「支、枝」字形倚近，予百姓掠叫是仝音字。

本來佮「枝」仝音个「妓」--字也有類似个發展：正音 kī，俗音 ki。1873 杜嘉德牧師廈英大辭典就有收「chhiong-ki、chhiang-ki (漳)」(娼妓）、「ki-lú」（妓女）。杜牧師有註明「妓」个讀冊音是 kī。總--是，「娼妓、妓女」迄時民間普遍攏唸做 ki 矣。

「妓」个中古音是上聲「渠綺切」，意思本是「女樂」，後來變做「性工作者」。以外，也有平聲「居宜切」个音，意思有出入，「妓姿」指「女容」。雖然平聲唸法佮閩台語 ki 第一聲對應會起來，但是若欲尊重閩台語个漢文音義傳承，猶原應該將 ki 看做是俗音。