「抱歉」个台語正音是 phāu-khiám

「抱歉」即个書面語，台語正音是 phāu-khiám，「抱」應該唸文言音 phāu，「歉」佇所有重要个台語字典（彙音妙悟、彙音寶鑑、甘字典）攏只有 khiám 第二聲（上聲）一種唸法，稽考多數个中古音韻書嘛是記做上聲，少數記做去聲。

但是我自細漢聽儂攏將「抱歉」，唸做 phō-khiam。照我推斷[tshui-tuàn]，這是三、四十年前開始對北京話吸收來个講法。

一、戰前个台語文獻無查著即个詞。戰後咱看會著陳降祥傳道師 1961年个白話字作品《Tang-pō͘ Thoân-tō Kiàn-bûn-kì》（東部傳道見聞記），伊閣會曉唸正音 phāu-khiám。教會公報 1968.12，第1043-1044期合刊 p.26 嘛是寫 phāu-khiám。

二、戰後台語儂程度直透退化，民間開始時行即个華語書面語个時，「抱」袂曉唸文言音 phāu，唸卡簡單个白話音 phō，但是 phō 是表示身軀具體个動作，無應該用佇即種抽象个心理態度个書面語。「歉」因為佮「謙 khiam」字型差不多，掠叫兩字仝音，所以唸做 khiam 第一聲。所以唸 phō-khiam 兩字攏毋著。

三、若是閣卡現代个台灣儂，就會照華語音「欠、歉」仝音來做類推，將台語「歉」唸做「欠 khiàm」第三聲。

目前教育部台語辭典个注音是：「phō-khiàm　又唸作 phō-khiám　俗唸作 phō-khiam」。

小結論：台語音有夠亂。Khàu-pē！我毋是咧罵儂，我是咧悲哭阮父祖个語言連回甲今仔日即款地步。

大結論：語言是約定俗成个，既然現時真濟台灣儂攏聽有 phō-khiam，咱若講 phāu-khiám 怹顛倒聽無。徛佇溝通个立場，我袂堅持愛唸正音。但是做一个有理想个台語文老師，我也袂愛違背我个「語文良知」，綴逐家講即種「刁工學華語詞，結果又閣唸甲a-lí-put-ta̍t个走音」。我欲表達即方面个意思，猶原繼續使用自古流傳个台語講法，看款場合、口氣、程度來選用以下个詞：

• 歹勢[pháinn-sè]
• 歹神氣[pháinn-sîn/sîng-khì]
• 卡拗蠻[khah áu-bân]
• 袂得過[bē-tit-kuè]
• 失禮[sit-lé]
• 真不住[tsin put-tsū]
• 對不住[tuì-put-tsū]

昔時賢文：知音說與知音聽，不是知音莫與談。[ti-im suat í ti-im thing, put-sī ti-im bo̍k í tâm].

台語正音汝若講予我聽，我會呵咾汝𠢕[gâu]；汝若講予不懂[put-tóng]--个 聽，伊會笑汝毋成猴。

古早台語儂用「正音」即个詞，tshiâng-tsāi是指「官話」，親像「正音戲」，是指講北京官話个大戲。總是，當今咱知影，咱个語言，比北京話閣卡「正」。

關係「台語正音」个層次，我有一篇簡單說明〈關係「台語正音」个一寡層次，兼論「參與」个台語音〉