拜訪中國農民

昨昏暗睏無啥落眠，早起未精神，夢著去中國拜訪農民，佇田裡。

我看著歸區空空，猶未落田。遮个農民，無錢通買，有錢亦無塊買卡現代个農機。但是怹嘛無使牛[sái-gû]，iōng-kōo土想，家治設計、製造一寡機械[ki-hâi]。我哪看怹咧試，哪想講，怹連台灣三、四十年前著用甲無愛用个鐵牛仔嘛無（我細漢定定佇阮大厝埕尾卡去个芎蕉園邊，耍一台歹去囥咧予雨沃甲生鉎liù-phí，已經椆佇塗裡个鐵牛仔）。當然，怹閣卡無 thoo-lá-kut-tá 通用。

佇夢中，感覺經過足久，即个農民，才將田地挖出一空。我倚過看，發現迄空下跤烏lang-lang，竟然是一大間地下室。原來，即片土地，毋知偌久晉前，有建商來起厝，地下室佮地面khōng好，模枋拄拆起來。尾手公司煞錢水tsik-táu，工程自按呢懸[hânn]咧。年久月深，風飛沙khàm一重塗皮佇紅毛塗个地面頂。農民得著即塊地，掠叫會凍種作[tsìng-tsoh]，歡喜甲-。無疑悟是荒廢个工地，tann煞毋知欲按怎？