按怎面對傳統宗教對「同性戀」个觀點？

世界上有久長歷史个各大宗教，敢哪攏嚴格反對「同性性行為」，有儂講「同性性行為」無等一是「同性愛」，因為愛情佮性應該分開看待。但是古早宗教一般無咧考慮「純純个愛」，而且實際上有才調保持「純愛情」个儂實在是足少足少。

亦著是講，合理个「教義詮釋[tshuan-sik]」應該是：既然教主、經典攏講袂使有「同性性行為」，按呢咱一開始著無應該佮同性發生愛情，若無，緊縒[tsua̍h]慢 會陷落罪惡个性行為。

即種詮釋，是佮現代科學、現代價值觀，有對逆[tuì-ke̍h]佇咧。所以有儂設法欲對古教典進行別種詮釋。當然，另外一方面，無認同「同性戀」个儂，著堅持傳統个解說。

任何一个虔誠个現代宗教家、傳道者攏著愛面對即个教義問題。我是佛教徒，但是毋是居士、法師，無夠格解說佛法來指導別儂按怎過生活，所以算是變相來閃掉即个問題。毋過，個人猶原永遠袂凍閃避「著愛認捌情欲个本質」即个人生个大課題。若無，即世儂又閣白活啦。