進前我有論說[lūn-suat]過，欲寫台語文，著愛看款讀者、主題、文體、發表媒介，來考慮寫作策略，調整用字用詞：〈佇社群網站書寫台語文个策略〉。
迄時無舉文例，以下抾我最近寫个三篇文來做參考：
第一篇記念日本 311 大災難兩週年，是社運文章，採取清爽、好讀个台文風格，希望一般鄉親，雖然怹無學過台文，猶原真緊就看有，來認同阮借用文字，所欲鼓吹个反核理念。貼出來了後，初接觸台文个面友，有特別共阮肯定即種文風。
********** 第一篇開始 **********
【記念日本311大災難兩週年，咱著覺醒核電太危險】
今仔日是 2013 年 3 月 11 日，也就是 2011 年日本複合性大災難兩年滿，日本儂降半旗哀念。
311 大地動、引起海漲[hái-tiòng]、致使福島核電廠爆炸。
以馬英九、江宜樺做頭个外來統治階級，到今閣咧欺騙咱。馬英九講停建核四，會對國安不利。伊个「國」就是「國民黨」个意思啦！江宜樺先講台灣絕對袂發生福島迄種災難，後來閣講，若發生災害，甘願放棄幾千億个核電廠，嘛會顧全人民安全。
怹根本是咧騙痟个！核電廠出代誌，毋是放棄勿管就無代誌，彼[he]輻射洩露根本封袂椆，福島電廠到今仔日猶原咧污染太平洋，怹三十公里內个居民攏撤退變難民。咱个核一、核二、核四廠任何一廠，到時若發生即種災難，全台北市民嘛攏著逃命，咁走[tsáu]會離、咁走有路？
請問政府，欲按怎款待遮个儂？放棄台北市？叫蒙藏委員會空運數百萬台北儂去蒙古大草埔，睏蒙古包？即个夭壽政府，根本無欲處理啦！原能會个核災應變計畫只有 5 公里，其實啥乜攏無做、也無才調、無可能做，只有紙上作業佮可笑个庄頭小演習爾爾。
予一个無血無目屎、假仁假義假斯文个流亡組織、鱸鰻集團統治，正是台灣最大个複合性災難。即个災難，已經持續六十年，未來會閣一直傷害咱。
********** 第一篇結束 **********
第二篇是欲建議台灣話俗諺語典个編者，提供華、台俗諺對應引得[ín-tik]，發表佇 Facebook 个社團「台灣話資料交流所」。因為所面對个讀者，攏有相當个台語文素養, 所以就會用較濟古早、tuan-tiah 个台語字眼佮表達法，漢字歹表現个詞，就直接寫羅馬字。毋過，這是欲佮儂密切溝通个遊說文[iû-suè-bûn]，毋是表現私奇心情[su-khia sim-tsiânn]个文學創作，所以猶原有撙節。
********** 第二篇開始 **********
【《臺灣話俗諺語典》若有華台對應引得 會閣較得力】
目今五十捅歲以下个台灣大多數儂，華語表達能力íng比台語較好。無論是欲講台語，抑是寫台文，上捷拄著个困難，就是頭腦內puh出一句華語音个文言成語，抑是華語俗諺語，閣來就 tsik-táu--teh，想規晡，毋知台語有啥乜倚韻閣媠氣个講法。
所以一phō方便好用个台語俗諺語集，若會得提供即方面个輔助，對提昇全民个台語文表達能力，就會有 tshut-pān大个效益。
雖然我到tann只拜讀過蕭藤村老師大作《臺灣話俗諺語典》个一小部份，但是我相信，佇遮爾phong-phài、tsa̍p-tsn̂g个俗諺大全集內底，任何咱想會著个文言成語抑是華語俗諺，攏揣會著對應个台語講法。
總是，真無彩个是，即phō大全，並無提供即種角度个索引查詢目錄，tì-kàu咱íng-íng袂免得望洋興嘆，毋知咱想著个迄句華語，上蓋bā-tah个台語對應講法佇佗位。
********** 第二篇結束 **********
第三篇是我改寫个〈狗失落肉个喻言〉台文版，按算配合有台文字幕个動畫來發表，因為有配音thang聽，文字版也有詳細註解，所以正文盡量用進階个台語來寫。即篇个語文程度適合大儂，若是欲讀適合囡仔程度个台文版本，早前捌有先進出版過，所以我無必要閣重做仝款定位个改寫。以下只列正文，無附註解，因為按呢，正文內底就補添較濟注音。
********** 第三篇開始 **********
【狗失落肉个喻言】
各位鄉親父老，食飽未？我是盡忠為台灣个古意狗仔阿勉，今仔日，我欲來讀潘科元先生一篇台語文【狗失落肉个喻言】。這是伊對2500年前古希臘出名个I-sap寓言[gū-giân]所改寫个，題目號做【狗失落肉个喻言】。咱講「喻言」，意思是設譬喻个言語，講古來款勸世間儂，著愛存好心，做好代。
講古早古早，有一隻散狗[suánn-káu]，落街分著一塊三層肉，伊歡喜到極[kàu-ki̍k]，將迄塊肉咬佇喙裡，毋甘現食，欲走轉去伊个狗岫，才穩心仔啗嚵[hám-sâm]。
伊三趒四跳，喙瀾沓滴，來到一條板[pán]仔橋頂，煞看見圳溝中，有一隻毋成猴个遛氈狗[liù-tsinn-káu]，嘛咬一塊精肉。
水泱[iann]搖動，迄塊肉 iá比家己即塊閣較大，看了sannh心，開喙對伊 ngauh-ngauh吠，欲共伊搶過來 ê sūn niâ… Tőm一聲，家己本來咬咧迄塊肉，煞lak落去圳溝底，予水流去。水中迄隻狗，面仔gām-gām，喙裡个肉嘛無看見囉。
元元子講：
古早儂言「媠花佇別儂欉，媠某佇別儂房」，世間儂上愛窮分計較，數想非份，家己手裡有个，íng毋知通珍惜，欲閣去外口共儂綿綿討、橫橫翱[kô]。歸尾，煞連本來所有个嘛攏喪失去，雙頭無一ngauh。
想真，彼不過是儂內心慾望个反射爾爾，咱陷落佇迄个永遠坉[thūn]袂滇个深坑內底，究竟欲到佗一日才會得出脫咧？
********** 第三篇結束 **********
Comments powered by Disqus.