教台典用字【轉臍 tńg-tsâi】意思無通。
俗語：新婦教大家tńg臍。（Sin/sim-pū kà ta-ke tńg-tsâi.）
"tńg-tsâi" 教典寫「轉臍」，tńg-tsâi 是用鉸刀、手術刀等鉸斷、切斷，欲呔會是用「轉踅[tńg-se̍h]」的「轉」，硬tsuān tsuān甲lak--落來 nih？
洪惟仁老師《臺灣禮俗語典》寫做「剸臍」，伊个考證（p.19）是按呢：
------
「剸」，玉篇：『截也』，唐韵：度官切(tuân)，又之兗切(tsuán)。字同剬，廣韵：「剬同剸，細割也。多官切(tuan)。』。剸剬二字的注音各家不一。我們如取多聲母，兗韵，合起來便是 tuán 白話音即為 tńg。雖不是正字，可以算是「準正字」。
------
伊的意思就是講，將兩組無仝个反切音記錄，一組取聲母、一組取韵母，kap做伙，按呢才鬥會出 tuán / tńg 的音，這佇本字考證上有較勉強，毋是正字，只算「準正字」。
教典另外收「斷臍」做「轉臍」的異用字。論真這个「斷」字音義上搭峇！
「斷」除了白話音 tňg（泉音陽上第六聲）、tn̄g（廈）、、tuīnn（漳），文言音陽去第七聲 tuān（斷絕 tuān-tsua̍t、一刀兩斷 it-to.-lióng-tuān）、陰去第三聲 tuàn（判斷 phuànn-tuàn、決斷 kuat-tuàn），其實閣有上聲（第二聲）的讀法。這佇康熙字典有收，但是以下我另外引用別本古冊，因為伊解說了較簡單明瞭：
唐朝張守節《史記正義》冊頭前有一篇〈史記正義論例謚法解〉，其中一節「發字例」（「發字」就是讀勾破音的字，也就是一字多音，尤其是多聲調，對應無仝解說、詞性），就有舉「斷」字三種聲調呼音，對應三種意思：
------
斷：端管反，有物割截也。又段緩反，自相分也。又端亂反，斷疑事也。
------
以上三音：
1.「端管反」就是 tuán，白話音就是 tńg。這是他動詞，割斷、截斷物件，就是咱的主題 "tńg臍" 啦！
2. 「段緩切」切出來是陽上聲 tuǎn，白話音就是 tňg，這佇泉音有保留，廈音變陽去聲 tn̄g，漳音是陽去聲 tuīnn。這是自動詞，張守節寫「自相分」，就是物件家己斷[tn̄g]去。
3. 「端亂切」就是 tuàn，「斷疑事」（tuàn gî-sū），就是審案、判斷[phuànn-tuàn] 這類的代誌。 只不過，佇實用上來講，寫做本字「斷臍」，予一寡台語程度無好的台灣人看著，恐驚十个有九个攏會唸做 tn̄g-tsâi，袂曉唸 tńg-tsâi。所以實用性無懸。總是，教典用「轉臍」是有淡薄仔好笑，寧可寫做準正字「剸臍」。
「斷」字上聲文音 tuán，咱一般真罕得用著，除非是讀古文，有音註叫咱到遐著讀上聲，若無，一般攏唸去聲（陰去、陽去兩種）爾爾。「斷」字上聲白音 tńg，至少有 tńg-tsâi（斷臍）、tńg-ínn（斷穎）是農村生活常用語。
補充1：張守節佇「發字例」頭前寫「古書字少，假借蓋多，字或數音，觀義點發。」台譯：古冊有thang用的字較少，用假借字的情形扑算真濟，一字可能有幾若个音，看是啥乜意思，咱著共伊「點發」來呼音。「點發」就是「點撥[tiám-puat]」，也就是台語所講的「勾破」，佇一字个四角落某一角做勾破記號分別表示平上去入，來提醒著呼勾破音，毋通照慣用的聲調去呼讀。
補充2：tńg臍用鉸刀。特殊情形，全然[tsn̂g-jiân]無家私頭仔，姑不將著用喙齒gió，叫做「gió臍」，南管音 giró-tsâi，傳統戲齣《白兔記》內底劉知遠怹囝个乳仔名就是「咬臍」。
補充3：引用嚴新富老師調查記錄：
「將冇骨消烘熱取汁沾手，再做醫療動作；以前醫院要剖腹生產的例子，受訪者媽媽可以順利用手接生；以前無剪刀時，則以老桂竹或石頭切臍帶，再以苧麻繩線綁臍帶；止血後很乾；以雞毛沾油，擦嬰兒的身體，肚臍斷掉尚無完全好時，會拿煙斗頭的黑色油沾口水，擦嬰兒的肚臍治療。」
Comments powered by Disqus.