以下个對話來自「新聞挖挖哇」(2015-10-28) 電視節目：
陳亭妃：「我做（台南市）議員个時，質詢嘛是用台語質詢，只是到立法院變成無仝款，因為足濟官員講台語伊聽無啊，所以汝愛閣共[kā]翻譯啊，〔有那個時間差〕，汝共問了，伊閣愛扽蹬--一下，叫伊邊--仔个助手共伊做一下翻譯。」
鄭弘儀：「是按怎講號做『扽蹬』--一下？『扽蹬』是啥乜意思？」
陳亭妃：「『扽蹬』就是〔停一下〕。」
謝龍介：「『扽蹬』有个儂是咧思考啦，一種就是講一時 tsua̋-á tshenn-tso̍h--去。」
于美人：「『扽蹬』就是〔停頓〕嘛！」
某來賓：〔猶豫一下〕
謝龍介：「無法度回應汝。」
鄭弘儀：「tenn 是啥乜？」
謝龍介：「『扽蹬』即款个用詞，當然變做通俗用語[iōng-gú]去矣。」
謝龍介無法度分析 tùn-tenn 个 tenn 是啥意思，但是伊嘛無 tùn-tenn，直接 uân 講就是通俗用語。XD
即个詞臺日大辭典寫做「扽𩨑」，「扽」是「突然 搝[giú]拔」个意思，第二字「𩨑」（骨+丁）是「蹬」个異體字，就是跤後蹬、手後蹬（華語〔腳後跟、手肘後〕）个意思。「蹬」漳腔唸 tenn，泉腔唸 tinn。
「扽蹬」个字面意思是跤後蹬搝倒退來反抗，毋予儂拖咧走，抑是跤後蹬出力拄塗跤，擋咧毋肯繼續行，實際个意思，咱看三本重要辭典个解說：
廈英大辭典(1873: 492)：
tùn-tiⁿ, to make objections or excuses, as man wishing to avoid doing what he is ordered.
意思是：提出反對抑是藉口，可比儂若毋肯聽命令，想欲閃避。
廈英大辭典補編(1923: 226)
tùn-tiⁿ(+), stubborn, said also of children and animals.
伊是佇廈英大辭典个基礎上閣加一項新解說：「固執，也有咧講囡仔佮動物。」
臺日大辭典(下冊 1932: 389)：
子供など嬌えていふことをきかない。だだをこねる。むづかる。－－不行(m̄ kiânn)=だだをこねて步かない。
大概个意思是：囡仔等 sai-nai 毋聽話。使性地。
按呢看起來「扽蹬」个實際用法，是指毋肯順從、聽命令，停頓、躊躇[tiû-tû]、揣理由無愛行動，尤其是指囡仔佮精牲。
但是咱看陳亭妃、謝龍介怹个現代用法，「扽蹬」已經變做時常用佇較單純个停頓一下、反應袂過來，一時間無法度採取行動个意思。
當然，嘛會使繼續用佇心理上有抵抗个情形，像講：「叫汝緊來 毋來，是咧扽蹬啥？」
頂面引話，謝龍介閣有用著 “tshenn-tso̍h” ，這本字可 能是「生射」，佇遮無閣了工稽考漢字，只是解說意思，本來 tshenn-tso̍h 是「驚慌失措」个意思，但是謝龍介佇遮个話意，較偏向單純个「不知所措」。
設使對讀者來講，恁个「扽蹬」若只有「停頓一下、一時反應袂過來」个意思，按呢欲強調毋肯順從个反抗心理，閣有一个兩字詞 thang用：「扽張 tùn-tiunn」，「扽張」就是單字詞「張 tiunn」个加強型。
「扽蹬」有先進贊成寫做「頓蹬」，怹講「頓」就是文言文「頓足」个意思，但是即个意思个「頓」，照講台語口語是唸白話音 tǹg，像「趒跤頓蹄/地 tiô-kha-tǹg-tê/tē」，毋是唸文言音 tùn，即點較僫解說，所以我先暫時採用台日大辭典个用字。
（本文原來發表佇 Facebook 個人頁面个網誌，下底有袂少五路先進个回應，thìng好進一步印證。）
Comments powered by Disqus.