代先，對「教育部臺灣閩南語常用詞辭典」網站（以下簡稱教台典）先講起，既然名稱有「常用詞」，現拄現就是定位做以「常用詞」為收列對象个基礎辭典爾爾，不過伊也會收一寡仔目前已經較罕用，有文化價值个台語舊詞，總是無偌濟。
真濟台語界个朋友，傷過倚靠教台典，拄著毋捌个台語，干焦會曉查教台典（其實會曉查教台典，就已經比九成九以上个台灣儂較gâu矣啦！）。佇教台典查無个台語詞，有个朋友就無啥接受，甚至排斥，閣有个朋友是真煩惱無收--著遮个寶貴个台語詞（包括無仝腔口个講法）會因為教台典無收，致到來滅亡去。
咱一方面毋通干焦倚靠教台典，也著查考其他个台語文獻，也著盡量共老大儂請教，閣一方面也著責督政府，繼續編集閣較豐富个台語資料，公開上網，方便社會來利用。
台語資料無所不在（品質參參差差就有影），連「教育部重編國語辭典修訂本」網站（以下簡稱教國典）嘛有一寡仔台語詞通抾(thang khioh)，而且其中有幾筆仔目前教台典無收著个台語哦！
Q：欲按怎看著教國典所收个台語詞啊？
A：佇檢索頁面，預設个查詢項目是「字詞」，請改點「全文」，了後佇查詢欄扑「臺語」（毋是「台語」）抑是「閩南方言」，閣點「查詢」就會出現幾十筆台語詞。
教國典所講个「閩南方言」，其實是指台語，毋是福建閩南語，像「草地」伊解說是：
『閩南方言。指鄉下、農村。如：「草地人」、「他是從草地來的。」』
「草地」指「鄉下」是台語才有，閩南話無按呢用，無接觸過台語个閩南儂聽著「草地」，會掠叫是「發草个地」。（相對來講，古早台語有講 hiunn-ē，現時佇台灣本島已經罕得聽著矣，但是澎湖、金門閣真通行，閩南也有。）
教國典所收个台語詞，漢字寫法大部份是用「台語火星文」咧寫（而且也無標台語音，是照台語火星文个漢字去注華語音），因為台灣目前个「國語文」寫著台語時常就是用「火星文」，像「壓霸」寫做「鴨霸」，世間个動物hiah濟種，是按怎「鴨仔」特別「霸」咧？無伊法，火星文就是遮爾壓霸啦！
教國典有收，教台典猶未收个詞，親像「大尾」、「鯤鯓」、「手面賺吃」（正字是「手面趁食」，即个詞今年會收入教台典）等等。另外，雖然教台典有收，但是教國典解說了愈深入个台語詞，像「挲圓仔湯」（教國典寫「搓圓仔湯」），教國典有解說語源，教台典無！閣像教國典有單獨收「念歌」，解說是：『臺語以說、唱表達意念的一種藝術。』教台典無單獨收，干焦列佇「唸」字个釋義內做例詞「唸歌」，而且解說了傷簡省：『唱歌謠』，無提起「唸歌」是結合語言佮音樂，蓋重要个台灣藝術形式，真無彩。有興趣个朋友請家己去參考看覓。
教國典會收遮个台語詞，是因為遮个詞已經深入台灣華語文，所以欲讀有台灣華語文也著了解遮个詞个來源佮意思。
Comments powered by Disqus.