整理台語舊詞、制定台語新詞草議

台語舊詞直透死，新詞袂赴生。咱愛設法來復育，整理舊詞、制定新詞。照理想來論：

整理舊詞：

一、界定常用詞彙、次常用詞彙、進階詞彙、其他詞彙等等。

二、以客觀个田野調查做根據，來收集「一物多名」个舊詞，畫出每一項常用詞無仝講法个地理人口分佈圖、號名類型分枝圖（ 像〔百香果〕个稱呼分做四大類：時計果漢字音變體、時計果日語音變體、書面漢語詞變體、台語本身講法變體）。

三、配合有共識个理念原則來整理，一方面盡量完整記錄、公開，予各地个台語儂查考在地講法，方便鄉土語言教學；但是一方面也著去蕪存菁，親像〔蝌蚪〕个台語有規百種講法發音，佇全國性个傳播場合，著愛有一兩種仔通行講法，方便快速溝通。另外也著適當來精密化，看是毋是應該愛分有跤、無跤个〔蝌蚪〕，抑是四跤仔、螿蜍（蟾蜍）个〔蝌蚪〕。

制定新詞：

一、歸納古早台語儂創造新詞个各種類型、法度。像舊詞新用、組合舊詞素、吸收文言詞／和製漢語詞／華語詞、外語音譯、混合構詞等等。

二、收集目前對新事物，猶未足通行个新講法，抑是建議講法。

三、自然類个名詞（包含舊詞、新詞），也著參考專業學術界个智識系統个分類。

四、綜合以上，系統化來大量制定新詞。

以上各點，攏著利用資訊技術，建立網路有聲資料庫，免費開放予各界查詢。同時也予各界快速提供語料、反映意見，用軟體輔助來統計、分析，隨時更新資料庫。按呢才會赴市！才袂予唱衰台語个儂，講咱个話綴袂著時代文明，死死咧好啦。