「文」無足額表「音」

今年正月初，捌寫一篇「扑算」，解拆[ké-thiah]即个詞个兩三種意思佮用法，最後講著理想个台語拼音文字除起調號，閣著號明[hō-bîng]本變調，才有十全[tsa̍p-tsn̂g]，嘛批評一寡儂執訣[tsip-kuat]佇教羅个傳統裡。看迄號範勢[pān-sè]，姻最後公佈个台羅，差不多就是按呢矣。總是，我佇遮卜閣來pué-huē一種觀念：著準是拚音文字，亦常在[tshiâng-tsāi]是「『文』無足額表『音』」。

英語文迄種「文、音大離經[lī-king]」个拼音文字著免講，比在日語个表音文字ká-ná（かな）來論，猶原是無ka-nn̂g－－伊無標出有辨義作用个重音，學習者重音若唸毋著，三不五時意思就走縒[tsáu-tsua̍h]去。

按呢，對文字个讀者來講，語文程度个要求著卡峘，才唸會好勢；顛倒對書寫者來講，卡輕鬆，因為伊毋免逐字標重音。總是，對讀者个視覺來講，按呢亦有一步好，袂予一堆重音符號遰遐逆目[ke̍h-ba̍k]。

抑台語个情形咧，照我頂日所提說[thê-sueh]，若干那註明本調个所在，雖是有卡清幽（親像佮日語重音比起來），總是，卜要求一般个寫作者，隨个仔去掠聲調、做號頭，彼是不止大艱計。汝共想昧，照一般通俗个羅馬字教學法，攏是1-7-3-2-1-7佇咧lin-long-gô，gô甲花kô-kô，學習者最後總算掠出正確个本調第幾聲（究其實[kiù-kî-si̍t]是「調類」），即馬煞要求姻愛閣再想liàn-tńg，加[ke]誌載[tsì-tsài]是讀本調抑變調，定規會予儂喝咻[huah-hiu]唱[tshiàng]反對，閣再予「實調派」个主張者正摳倒剃[tsiànn-khau tò-thì]，乘紲[sīng-suà]釘[tìng]甲椆下[hē]壁=裡。

所以若當做文字來共論，現此時即款但是[nā-sī]寫記調號，無閣再批明本變調，嘛算是得其中仔[tik-kî-tiong-á]个法度。毋閣，佇塊huānn盤設計符號个，共款愛擔領[tam-niá]即个「文無夠額表音」个問題。專工為「音標」个需要，來加做出一寡符號，予儂會得用佇辭典、課本、讀本、囡仔冊，或是講究个出版品內底。

「羅馬字本身著是文字兼音標」，就符號來講，是做會到。總是，以實用來講，iá是著分層次才好，勿用怙[īng-kōo]一種著想卜攏ba̍uh。