台灣民間說唱文學歌仔冊資料庫網站（以下簡稱「歌仔冊網」）有標音、註解一phō歌仔冊《新刊莫往臺灣歌》，這是清朝文人寫个勸世歌，當時清廷閣有海禁，不准人民渡海過台灣討趁，作者勸儂留踮福建故鄉扑拚就好。本歌半文半白，有寡所在實在無把握伊是欲唸文言音抑是白話音，總是，也有寡所在，咱知影著唸白話音。歌仔冊網个註解，有幾个仔所在，末學有無仝款个淺見，記錄佇遮，提供交流參考，敬請五路先進賜教指正。
以下圖檔，出自台大圖書館楊雲萍文庫。即本歌仔冊除了莫往臺灣歌以外，後壁閣有《台灣小娘仔歌》、《台灣表子三十六款》。
第 1 面第一葩「在厝無路 計較東都」：歌仔冊網認為「計較」是「過到 kè-kàu」个借音字，伊寫：『過到。泉腔晉江話「過」音kè。 王育德註(以下簡稱王註)：「東都」是鄭成功時代對台灣的稱呼。』
在我土想[thóo-siūnn]，「計較」毋是借音字，應該照字直解，閩、台語「計較」有兩種意思，一種是「親tsiânn mài計較」迄種「計較」，一種是「用心計較」个「計較」，我認為也就是本歌「計較東都」欲表達个意思：用心思量、計劃[i̍k]、安排欲去台灣討趁。文章一開始是閣咧按算个階段，若直接就講「過去台灣」文理無順。
第 1 面第二葩「悻悻而來」：歌仔冊網解說「悻悻」：『王註：「悻，憤怒貌，已無後退的餘地，故表情凶狠。」施按：疑音hìng，字應作[忄+興]，[忄+興][忄+興]，很有興致。』
「悻」字音本身是唸 híng，我看佇遮也應該直音 híng-híng，總是舊口語 híng-híng 意思佮「憤怒」無tī-tāi，是華語〔興沖沖〕个意思。即个詞現代台語儂慣勢講做 hìng-hìng，大概是因為按呢歌仔冊網才會講「疑音hìng」，其實廈英大辭典(1873，簡稱廈英典) p.126 就有收 híng-híng 矣（伊用教羅拼法 héng-héng），臺日大辭典(1931，簡稱台日典）嘛有收 híng-híng。廈英典查無 hìng-hìng，到台日典才有收【頭興興 thâu# hìng-hìng】，hìng-hìng 大概是後起个講法。廈英典寫：
héng-héng，with all one's heart; quite in the spirit of a thing; full of desire to do something at once. héng-héng saⁿ-kap-khì, went with him with all his heart. khí-thâu héng-héng, bé-chhiú léng-léng, at first very warm for it, afterwards very cool. héng-héng tì koe-mn̂g-chhéng(fond of wearing a dust-brush instead of a feather in his cap), said of a mean fellow making himself very consequential (cf. hèng).
看廈英典對 híng-híng个解說佮相關个例句、押韻俗語（「起頭híng-híng，尾手冷冷」、「híng-híng戴雞毛筅(tshíng)」），咱通確定本歌「悻悻而來」就是唸做 híng-híng。
第 1 面第 4 葩「自帶乾粮(糧)」：後兩字歌仔冊網標音做 ta-niû。不而過，台日典上冊p.215 有收「乾糧 kan-niû」，顛倒無收 ta-niû。
第 1 面第 7 葩「不知東北 暫宿山埔」：第 6 葩有寫「乘夜上山」，是指偷渡來台灣，趁暗暝「登陸」，早年閩、台語【上山 tsiūnn-suann】時常指「登陸、上岸」，也叫做「起山 khí-suann」，迄个「山」字是對應「海」，指「陸地」，無一定真正有山（「唐山過台灣」个「唐山」根本毋是指福建「長長个山」，是指「唐儂个土地、所在」）。尤其是偷渡者个做法，攏是揣海沙埔來上岸，袂刁工揣歹peh、危險个岩岸來登陸。到第 7 葩「暫宿山埔」，這佇歌仔冊網〈《新刊莫往臺灣歌》內容概述〉內底附圖个牛津圖書館藏本是寫做「暫宿沙埔」。「山埔」唸 suann-poo，「沙埔」唸 sua-poo，我看遮著採用「沙埔」較妥當。怹是半暝上沙岸，tshiau-tshuē無路，閣予強摃賊剝去衫褲，怹也摸無方向，應該是無才調行到有山个所在去歇佇「山埔」，應該猶原是佇「沙埔」个所在，「等待天光」才「行上幾步」。
第 2 面第 1 葩「四目无(無)親」：歌仔冊網標音做 sì-ba̍k bû tshin，「四目無親」是四字套語，佇南管曲詩有出現，咧唱昭君故事个〈出漢關〉就有「今卜共誰訴起？切！切得(於)阮淚淋漓，啼得(於)阮腸肝寸裂，四目無親，愛見君王除非南柯夢裡，愛見漢王除非南柯夢裡。」，其中「四目無親」是唸做 sì-ba̍k bô tshin，前三字攏唸白話音，「無」唸 bô，毋是 bû。廈英典 p.10、p.81、p.422，台日典上冊p.663-4，攏有收 “sì-ba̍k bô tshin”，可見這是以早个常用白話。
第 3 面第 8 葩「若有婚娶 樂尔(爾)妻帑(孥) 君子知成 終身不悞(誤)」：歌仔冊網解說「知成」講：『王註：知安分。「知成」大概是臨時新創的詞語。』。用無存在个語詞「知成」去硬解，其實意思講袂通，而且也無押韻个作用，我掠圖檔看一下真，雄雄智覺：作者應該是欲寫「知戒」啦！我閣看杜建坊先生《歌仔冊起鼓》，原來伊也是認為「戒」字才著。拄才我閣挖出歌仔冊網 頁面个 HTML 源碼來看，其實伊已經納入杜先生个見解矣：『杜建坊《歌仔冊起鼓》改作「戒」。』問題是網頁个格式製作了走爭去，致使『杜建坊《歌仔冊起鼓》改作「戒」。』即句話顯示袂出來，著請維護網頁个技術人員修改一下。
最後兩葩是押 i 韻（第2、4句韻跤），最後一葩「也顧坆墓 也育子女」，歌仔冊網「子女」標音做 tsú-lí，這是漳州腔，但是歌仔冊網將本歌定位做新泉州腔（無央元音），這有可能是作者為著押韻，佇遮刁工改唸漳州腔，但是另外一種解法是：作者是用泉州惠安腔，伊「子女」是唸 tsí-lí，按呢免改腔就有押韻矣。
下底附圖是彰化縣文化局南管曲譜資料庫所收，陳坤福先生手抄本《四集 御前清客》〈出漢關〉其中一張：
Comments powered by Disqus.