新教典正規表達式查詢法舉例之三附宿題

揣 ABB 結構詞

一、咱欲揣「ABB」結構的基本色水形容詞加強講法，查詢類型點選預設的「用臺灣閩南語查詞目」，搜尋欄拍：

^[紅黃青綠藍紫烏白](.)\1$

符號解說：

1. ^ 愛符合目標字串（指咱欲揣的教典所收詞）的上起頭

2. [ ] 中括號內每一个符號之間是「或者」的關係，佇遮咱拍 [紅黃青綠藍紫烏白] 意思就是欲揣出這八字的其中任何一字。

3. (.) 小括號內彼个半形句點 . 是指「符合目標字串」的某一字，啥物字無差。句點前後閣加小括號 ( ) 了後，是指愛將這个某一字「記起來」。

4. \1 頭前用小括號將某一字記起來了後，遮閣拍 \1 就是指第一組小括號所記的內容，按呢咱拍 (.)\1 意思是指仝款的兩字相接出現，也就是咱欲揣的 ABB 當中的 BB。

5. $ 愛符合目標字串的上後尾。上頭前咱有用 ^，上後尾遮咱閣用 $，若無這兩个符號來做限制，咱有可能揣出四字抑是四字以上的詞。

補充說明：其實咱的 regex 按呢寫，假使教典有收「紅紅紅」、「黃黃黃」……做詞目，嘛是會做伙揣出來，不而過，查詢結果顯示出來是無收這幾種色水的三疊詞。 搜揣的結果，共 10 筆，像：

紅記記
紅絳絳
黃錦錦
烏㽎㽎
烏趖趖
烏汁汁
…
…

揣 AABB 結構詞

二、欲揣教典所收全部的四字詞目，而且結構是 AABB –者，搜尋欄拍：

^(.)\1(.)\2$

註：

這个例，新教典的說明文件有寫著。遮特別提起，欲補充解說講：其實咱按呢寫 regex，有可能會揣出 AAAA 四字攏仝款的四字詞，只是事實教典無收這種詞。咱用 regex 來搜揣，大原則是甘願ke揣著一寡仔無合咱欲愛的詞，毋通揣落勾去。咱會使直接巡看查詢的結果，將咱無愛的詞目排除在外，但是若是揣落勾，就較無彩，也較無容易發覺著。

總共揣出 27 筆，像：

茫茫渺渺
挨挨陣陣
嘻嘻嘩嘩
歡歡喜喜
坎坎坷坷
搝搝搦搦
…
…

宿題

一、揣出教典的詞目當中，所有的三疊詞（三字攏仝款的三字詞）。

提示：結果干焦一筆。

二、揣出教典的詞目當中，所有的 AAB 結構詞。

提示：結果有包括「慢慢仔」、「密密是」、「沐沐泅」、「哼哼叫」、「好好人」……，計共 63 筆。

三、揣出教典的詞目當中，所有的 AXAY 結構詞。

提示：結果有包括「袂食袂睏」、「欲死欲活」、「面漚面臭」、「面憂面結」……，計共 82 筆。 各位所輸入的 regex 若寫了較簡單，就有可能會查著較濟筆數，但是結果內底會出現一寡詞目無符合題目所要求的條件，彼著愛扣起來。

以上我有鋪佇面冊2023-07-07個人動態，鋪文下底有一寡留言討論通好參考。