華語〔小巨蛋〕到底台語、客語按怎講？捷運放送愛按怎報？一直攏有爭論。結果最近台北捷運規氣決定用華語連講三擺「台北小巨蛋站」來準做「華語、台語、客語」三語廣播。高雄已經先按呢做。
關係即个問題，台語文界有兩條線路个主張，一條是主張直接照「巨蛋」看字讀台語音 kū/kī-tàn 就好；閣一條是主張台語無必要、也無應該照〔小巨蛋〕即種中文怪翻譯來讀台語音抑是直譯「較細个大粒卵」，咱應該自創台語个講法。
總--是，公共傳播个任務是愛講予民眾聽有，伊欲採用啥乜講法，若無「社會確實有咧流通」來做根據，報出來就達袂到傳播目的。台北捷運即種做法，論真只是反映一个社會現實－－台灣母語欲死毋斷氣，一般台灣儂，無論茈共老[tsínn kāng lāu]，根本無關心，也無要緊欲用母語來創新詞，橫直佇學校受教育攏用華語學新智識（已經 69 年啦！），按呢社會上个新事物，直接講華語，根本無儂感覺毋著。
極少數个台語專家，喝破咽喉[ian-âu]，提出用台語號名个各種看法，親像：kū/kī-tàn/tān（「巨蛋」唸台語音）、tòo-muh（英文 dome 音譯台語）、圓拱館[uan-kong-kuán]（用台語舊詞素組出新名詞）、圓頂體育館……目前看起來攏無彩工，因為咱無傳播權，干焦透過個人網站佮社群網站，實在無才調影響全民，予其中一種台語新講法時行起來。
佇現代社會，無傳播權（包含教育權），就無號名權。準做咱一時搶著傳播權，目前台灣社會對「發展母語」个心理支持度也足低。著愛先傳播，才有機會影響全民，得著認同，予新台語詞通行起來；但是欲捎[sa]著有夠力个傳播權，著先有民意認同母語、社會熱心支持个基礎，才爭取有路來，按呢煞親像「雞先抑是雞卵先」个兩難，結局也無雞、也無卵，這就是一切台灣母語所遭遇个劫數。
〔巨蛋〕台語欲按怎創新詞，會使參考杜建坊先生對各種提案个討論〈台北捷運「小巨蛋站」台語按怎講？〉
Comments powered by Disqus.