引用 Judy Hung老師个圖、文：「這可不是發粿與桃粿,而是普渡粿品-毛呼及必桃。」
寫「毛呼」是倚音借用，實際呼音是 môo-honn，第二字有鼻音。這是一種無包餡个糕仔，用做七月半普渡个祭品。
借即張相片，我來解說台語一種惡意个話：
「汝捌一个honn？」、「伊咧講一箍honn？」
講即種話會予老大儂罵講無家教，但是恐驚真少儂知影為啥乜這是歹話。
咱台語儂受氣个時，咧講歹話出氣，主要是利用兩大類个主題：「性」佮「死」。這是咱个文化內底，儂儂攏袂愛去面對个代誌，講出即種予對方袂佮意聽个主題个話，當然就會達到用話來攻擊伊个目的。
「性」个歹聽話，上嚴重个就是「用言語來性侵犯」對方上尊敬个序大儂、祖先。
「死」个歹聽話，有一種是將儂講做是「鬼」，但是無的確會明講，親像將「提去食」講做「提去孝孤啦！」就是罵講對方親像孤魂野鬼，無囝孫通「孝」，無物通食，真枵饞[iau-sâi]。「孝」是對動詞「孝順」，引申做「祭拜」个意思。
「汝捌一个honn？」即个 honn 扑算就是指普渡祭品个 môo-honn，孤魂野鬼無儂孝，當然毋捌食過 môo-honn，嘛毋知影 môo-honn 生做啥款。這就是用鬼來譬相[phì-siùnn]無智識个儂。
無講著「死」--字、「鬼」--字，甚至連 môo-honn 兩字嘛無完整講出來（正常咧稱呼即種祭品，一定是講兩字），只用一个「honn」來責罵儂。台語儂个祖先，拄開始想出遮个罵語，其實伊个修辭真高明，伊个態度真婉轉，但是用久了後，聽話者感受著个是講話者本身強烈个惡意，毋是婉轉个言詞，所以就會大變面。
以上是有合時令个台語探討 ^_^
註：本文是中元節个時，佇 Facebook 發表个。
(Facebook )
Comments powered by Disqus.