書介(004)《台語經典笑話》

冊名：台語經典笑話
作者：洪惟仁
版本：台語文摘雜誌社 1999年8月15日修訂三版

收集、改寫古早流傳落來，不止仔心適，閣有字眼个台語笑詼。袂少篇有誌載佇日本時代个冊，像《台灣笑話集》(川合真永 1915)、《台灣風俗誌》(片岡巖 1921)。有个是作者對怹序大儂、抑是鄉親前輩遐聽來个笑談[tshiàu-tâm]。

逐篇 齊短--仔[tsiâu-té--á]，攏是足讚个進階台語教材。內中有袂少媠氣、端的[tuan-tiah]个台語話，學會著，較贏汝九斗換一石。

今[tann]，江湖一點訣，公開對恁說[suat]：咱會使比較仝一段笑詼古，佇《台灣笑話集》个寫法，佮佇即本冊个句讀[kù-tāu]、語詞、氣口个差別。讀了過--兩日仔，家己看目錄，揀--幾篇仔，就咱對故事个記持，用家己个話重寫--一遍。才比較即三種版本，保領汝个台語文脫胎換骨。

《台語經典笑話》已經絕版，愛去圖書館借，一半間仔冊店拄彩閣有。 《台灣笑話集》遮有電子檔：http://jdlib.ntl.gov.tw/cgi-bin/browse.cgi?bookid=bjn00184

重讀完《台語經典笑話》，目睭花、腹肚枵，佇冊尾看著當年「台語資料服務中心代售[siû]書目」，發現有一phō「台灣嘆語辭典」，半暝喝一聲「尿壺蜈蚣！Tang時仔有一本專門收集感嘆語个台灣話辭典我哪會毋知？」

注神閣看作者欄－－「許成章」。啊！原來是《台灣漢語辭典》印毋著字啦。

註跤：孽詰仔話「Jiō-ôo-giâ-kang -- kiann sí gua̋ lān」。