會文堂歌仔冊《烏貓烏狗歌》咱愛用啥乜腔來讀？

【廈門會文堂歌仔冊《烏貓烏狗歌》(1932) 咱愛用啥乜腔來讀？】

廈門會文堂 1932 年出版《烏貓烏狗歌》佇題頭下底有註明【廈門會文堂書局翻譯】，冊尾閣再詳細記講【原著作唱念者台北 汪思明】【翻譯記錄者廈門 林谷聲】【印刷發行者廈門 會文堂】。

早前咧印冊个儂，無尊重版權，尤其是俗文學出版品，像即部[phō]歌仔冊按呢，將原唱念者、翻譯記錄者个名姓攏交帶甲一清二楚个，實在罕見。

汪思明是台北市儂，定居佇大稻埕。咱照日本時代留落來，伊所灌錄个曲盤聽起來，伊个腔口是有央元音 ir / er 个老同安腔。目今大稻埕腔已經無央元音，但是倚海淡水一帶个同安腔，猶原有央元音。

廈門話佮【無元央音个新同安腔】非常接近，但是有濫著一寡仔漳州腔。林谷聲所寫落來即部《烏貓烏狗歌》，照韻跤來分析，至少有三葩一定著愛用【無央元音】个廈門腔（即部份等一是新同安腔）來唸才會押韻，咱若用【有央元音】个老同安腔來讀，顛倒袂押韻。其他有真濟葩，無論用老同安腔，抑是新同安腔來唸，攏會押韻。但是並無一葩是的確愛用老同安腔來唸才會押韻，若用新同安腔來唸就袂押韻个例。迄三葩是：

(1) 新娘子壻肴辦事，二个平平有讀書，親家也巢好名譽，財產相當平平有。

【有】前三句个韻跤【事、書、譽】，老同安腔是 sīr、tsir、īr，但是因為第四句韻跤，無分新舊腔，只有 ū 个白話音，所以全部四句攏著採用新腔 sū、tsu、ū、ū 才會押韻。

(2) 烏貓閣去招四个，招因七姊甲八妹，上呆上猴上柴把，卜去郎是伊下勢。

【个ê、把（耙pê）、勢sè】決定【妹】愛唸廈門腔 bē，毋是老同安腔 bēr。

(3)烏貓呵媽顧後尾，手帝又閣櫸柴把，叫伊不通強強卜，無卜貢乎茫茫雪。 【把（耙pê）】決定【尾、卜、雪（踅）】攏愛唸廈門腔 bé、beh、 se̍h，袂使唸做 bér、berh、se̍rh。

現拄現，林谷聲並無實實記錄汪思明个唱念，是有改寫加工過。

今[tann] 問題是，咱欲讀即部作品，是愛唸老同安腔，來忠實反映原始創作者汪思明个腔？抑是拄著愛用新同安腔來唸才會押韻个所在，著愛改用新同安腔，但是整體上著愛唸老同安腔？抑是全部改用新同安腔（廈門腔）來唸？

我是主張，欲讀即部改用廈門腔寫落來，佇廈門出版个歌仔冊，咱愛攏唸廈門腔，勿閣唸出央元音。

儂會文堂有表明這是【翻譯】作品。將英文原作改寫做中文，是翻譯；將老同安腔个口頭演出，改寫做廈門腔个文字來出版，也是一種【翻譯】，咱讀翻譯作品，應該照翻譯過來了後个語言來讀，親像咱讀中譯本【羅密歐與茱麗葉】，無應該目睭看漢字，喙裡堅持欲唸做 Romeo and Juliet。咱無必要用按呢來表達對原作者 Shakespeare 个敬意。儂講翻譯是再創作，翻譯作品也有伊本身个【尊嚴】佇咧。

也無證據證明，林谷聲聽袂出老同安腔个央元音，所以才寫做廈門腔。我認為較大个可能性是因為伊是佇廈門个書局出版，採用較優勢个廈門腔寫，來予較濟讀者接受，較有銷頭，這是完全合理个市場策略。我相信即份文本就是定著欲予儂用廈門腔來讀。

咱欲整理當年个歌仔冊，共伊記音落來流傳、教學，也應該照頂面所講个做法來行，才有合理。若是愛欲唸老安同腔，著愛另外提汪思明个曲盤來記音整理，毋通提林谷聲个【翻譯】作品來唸汪思明个原音。

寫即篇个動機，是我去嘉義中埔中山國小露營區參加歌仔冊學會今年度个聚會開講（2014-07-25 ~27 三工），在場眾先進對即份文本愛用啥乜腔來讀，意見無仝。我轉來才將我个想法較完整寫落來，有參考施炳華教授台灣民間說唱文學歌仔冊資料庫內底一篇〈《最新烏貓烏狗歌》內容概述〉，網站另外有收即套歌仔冊詳細个音註。目錄連結：http://115.43.193.213/bang-cham/thau-iah.php

（即篇佇 2014-07-28 先貼佇 Facebook）