一、本 blog 个文章，請用台語讀。
二、本 blog 所寫个台語文，以漢字為主，無適當个漢字，用音標。驚仔儂讀袂好勢个漢字，嘛會加註音標。為漢字加註个台語音標，看需要，有時前後加月眉(gueh8-bai5, 著是括號)，有時無加。
三、音標用 TLPA，但是聲調數字無用上標，因為 blog 歹扑。必要个時，使用 # 號，表示 # 號頭前迄字愛讀本調；毋閣，通常攏愛讀者家治判斷是毋是愛讀本調。即个 # 號，我塊注古文詩詞个發音个時陣會卡ciap8用著，因為台語讀古文啥麼時陣愛讀本調、變調、輕聲，佮口語个規則有出入。即點是一个真值得研究个問題，可惜敢哪無儂致意(ti3-i3)。我所注个無的確有毋著。另外借用教會白話字个連字符(hyphen)。單連字符( - )連接一个詞（所以單連字符个頭前字攏讀變調）；雙連字符( -- )表示綴後壁个是固定低調輕聲。本 blog 對單連字符个使用無真嚴謹(giam5-kin2)，有時是表示斷詞，有時是表示連讀變調。另外，單等號( = )表示後壁字是隨前變調輕聲，這是 TLPA个用法。
四、我個人認為 TLPA 用 0 來表示輕聲，可比講「伊叫汝閣食一碗」i1 kio3 li2 koh4 ciah4 cit0 uann0 無妥當。標註佇韻母後壁个數字，應該一律攏標「基底形式」(underlying form)个「調類」（八音个調類），然後透過其他个標點符號來表示輕聲，類似白話字个做法：i1 kio3 li2 koh4 ciah8--cit8--uann2。毋閣，白話字个設計嘛是無夠理想，i1 kio3 li2 koh4 即幾兮音，到底卜讀本調抑是變調，並無符號來表示。kio3 佮 koh4 是讀變調（koh4 一般是「輕讀再變調」）這一般有受過台語文訓練个儂卡無問題，但是代名詞 i1或是 li2 有可能作者希望讀本調來強調，這佇符號上顯示袂出來。i1# kio3 li2 koh4 ciah8--cit8--uann2 是「伊」叫汝，毋是「別儂」叫汝；i1 kio3 li2# koh4 ciah8--cit8--uann2, 伊是叫「汝」，毋是叫「別儂」。另外，白話字嘛無分固定低調輕聲佮隨前變調輕聲。
五、引用資料，冊名、字辭典名用《冊名》來表示，文章个題名用〈文章名〉來表示。
六、對字辭典引用例句个時，若是一般聽會著个話句，無一定會註明是叨一本辭典。若是卡奇巧个話，叨會註明出處。有註明个時，漢字會調整予佮歸篇文章一致，抑是直接寫音標，音標用頂面所解說个系統來轉寫，但是腔口保留原作个腔口，最後即點愛請讀者注意。
七、定定引用著个工具冊，有簡稱：
Chinese-English Dictionary of the Vernacular or Spoken Language of Amoy, with the Principal Variations of the Chang-chew and Chin-chew Dialects, by Rev. Carstairs Douglas. 1873. 台北南天有翻印，冊脊加中文名《廈英大辭典》，我遮簡稱叫《廈英典》。
巴克禮牧師(Rev. Thomas Barclay) 1923年有出《廈英典》个補篇，台北南天翻印版收佇《廈英典》後壁。遮簡稱做《廈英補》。
《台日大辭典》小川尚義主編，台灣總督府1931-32年出版，台北眾文書局翻印，簡稱《台日典》。
《台語摘譯台日大辭典查詢》網路資料庫 http://taigi.fhl.net/dict/，簡稱《台日典網》。
《台灣話大詞典》陳修編著，遠流出版社2000年修訂新版，簡稱《陳詞典》。
《廈門音新字典》William Campbell（甘為霖）編著，台南新樓書房1913年初版，簡稱《甘字典》。
《彙音寶鑑》沈富進編著，文藝學社1954年初版，簡稱《沈彙音》。
《新編華台語對照典》邱文錫、陳憲國合編，樟樹出版社2002年出版，簡稱《華台典》。
《教育部國語辭典》網路版 http://140.111.34.46/dict/，簡稱《教國典》。
八、華語詞、句用【…】表示。
九、以上是暫時版，隨時會閣修訂。
Comments powered by Disqus.