三不五時會有朋友來問講，「反核、核能、核子、核電」个「核」，台語到底是唸 hu̍t（佮「佛佗」个「佛」仝音），抑是 hi̍k（佮「或者」个「或」仝音）？
簡單歸類：
一、「核」唸 hu̍t 一般用佇白話詞，像「龍眼核 lîng-gíng-hu̍t、荔枝核 nāi-tsi-hu̍t、𡳞核 lān-hu̍t、雞核 ke-hu̍t」个「核」就一定是唸 hu̍t（「龍眼、荔枝」即兩詞，變音真濟，佇遮無tsiâu列）。
二、若唸 hi̍k 屬佇文言，像「審核 sím-hi̍k、核准 hi̍k-tsún、核定 hi̍k-tīng」。
三、「核」有一个白話音 ha̍t，意思真特殊，是指皮肉phok規丸个一種現象，核[ha̍t]毋是瘤[liû]，無遐嚴重。像講「牽核 khan-ha̍t」就是指「淋巴腺腫大」。hi̍k、ha̍t 个文白對應，佮「力」是 li̍k、la̍t 个文白對應，仝款情形。
毋過這也僫講，若是彙音寶鑑，抑是吳守禮教授个台語字典，是將「核 hu̍t」算做白話音，「核 hi̍k」算做文言音，符合頂面个語詞用法。但是廈門音新字典是將 hi̍k 佮 hu̍t 攏當做文言音，意思也無分別；將 ha̍t 單獨看做白話音。
康熙字典引用个中古音韻書：
「《唐韻》《集韻》《韻會》𠀤下革切，音覈。果中核也。」這台語音切出來就是 hi̍k。
「又《集韻》《正韻》𠀤胡骨切，䰟入聲。果核也。」這台語就是 hu̍t。
「核」主要用佇名詞，指「果核」；若用佇動詞，指「查核」。伊做「果核」，反切切會出 hi̍k、hu̍t 兩音，台語生活語詞是講 hu̍t。伊若做「查核」用，其實是通「覈實 hi̍k-si̍t」个「覈」字，既然「覈」只唸 hi̍k，按呢「核」佇遮嘛愛唸 hi̍k，毋通佮果子核[hu̍t]混雜去。反切只有 hi̍k 个音。
中國个《閩南方言大詞典》，「核定、核算」有收 hi̍k、hu̍t 兩可，總是，照我頂段个分析，即種意思我無採用 hu̍t 个音。
按呢到底「核子、核能、核電、核心」即幾个詞應該採用佗一音？有兩種看法，一種是主張徛佇「意義分化」个立場來分別即兩音个用途，也就是講若欲指物體中心所包迄粒，就唸 hu̍t；若是「查核 tsa/tshâ-hi̍k」个意思才唸 hi̍k。所以著唸「核能 hu̍t-lîng、反核 huán-hu̍t」。
另外一種主張是徛佇「生活/口語、學術/書面」語言風格个立場來分別即兩音，也就是講若是生活上个口語，就唸 hu̍t；若是學術抑是書面用語，就唸 hi̍k。所以著唸「核能 hi̍k-lîng、反核 huán-hi̍k」。
徛佇實務立場，「反核、核子、核能、核電」遮个詞若是咱咧佮某一地（可比貢寮一帶）个鄉親講話，設使我聽怹攏唸 hu̍t，我就綴怹唸 hu̍t，按呢好溝通。若是我佇網路寫予全世界看、聽，我會寫、唸做 huán-hi̍k、hi̍k-tsú、hi̍k-lîng、hi̍k-tiān。
以前我去東北海岸，聽在地一位阿伯是唸「核能 hu̍t-lîng」。
我有請教恆春朋友李大姐，伊講怹个民謠老師陳英阿媽有唱著「核三廠 hi̍k-sann-tshiúnn」，逐家普遍也攏按呢唸。李大姐寫講：
『「這是核能電廠[hi̍k-lîng–tiān-tshiúnn]事故演習警報，請毋免驚惶。」Tng…tng…tng…（短--音tng誠久）。
台語、華語、英語輪咧唸。然後閣唸一擺解除警報（tng……一个長聲），仝款台語、華語、英語輪咧唸。
以上是福島事故了，透過分局佮派出所个擴音設備放送，阮定定聽著个警報，逐家攏聽甲會曉唸矣。最近無閣聽著。』
閣一層考慮，是我按呢唸：「核心 hi̍k-sim、反核 huán-hi̍k、核子 hi̍k-tsú、核能 hi̍k-lîng」，有一个額外个好處，會凍佮「佛心 hu̍t-sim、反佛 huán-hu̍t、佛子 hu̍t-tsú、佛能 hu̍t-lîng」做分別。
另外，若主張愛照意義來分別，有一點困難，就是若欲正實貫徹[kuàn-thiat]即種看法，「核子」應該唸做 hu̍t-tsí，毋是 hu̍t-tsú，按呢兩字才有前後一致。因為「子」指物體中心迄粒个時，是唸 tsí（瓜子[kue-tsí]、菝仔子[pa̍t-á-tsí]、銃子[tshìng-tsí]），毋是唸 tsú。但是其實並無儂唸 hu̍t-tsí。
Comments powered by Disqus.