梁祝歌仔冊含藏豐富个語言文化

東晉流傳到今个梁祝故事，英台姑不將著聽父母主意，嫁予馬俊，山伯誤著時機，娶袂著姑娘，suah直透起怨慼，恨伊英台薄情，家己凝甲致病來死，無帶念少年就守寡，苦心晟養孤囝成儂个老良嬭[niû-lé]。

為著男女情欲，一命烏有，最後閣拖英台死做堆，悲劇一場。當然，像化蝶啦，閻王予怹回陽，甚至升天做神仙夫妻啦，攏是後儂幻想个。

欲講這是禮教食儂也是有影，但是現代無即種社會制度，猶原有無數因為情場失意，suah死賴--儂个代誌。毋知童年个教育著按怎做，才會予咱个囡仔進入思春期了後，有較好个 EQ 通處理即種感情問題？

總--是，梁祝故事个閩台歌仔冊，內中有記錄非常豐富个語言文化，親像花卉、煮食、漢藥、嫁娶、喪禮个語言，不止通予咱學習。

註：一般華文个文獻攏是寫【梁山伯】，但是閩台歌仔冊寫做【梁三伯】个版本，比【梁山伯】加足濟。雖然【伯】文言音是 pik，對應白話音 peh，聲母攏是 p 無送氣，但是台語儂【三伯】慣勢唸做 Sam-phik。【三伯英台 Sam-phik-ing-tâi】即个戲碼[hì-bā]，前三字攏愛變調。