「植物」个台語音

「動物、植物」攏是「和製漢語」，也就是日本儂利用漢字來創造个日語新詞，無論中國現代官話抑是閩南語、台語，攏有佇二十世紀初學著即組日文詞，改用漢語呼音。

「動物」即个近代外來新詞，台語唸 tōng-bu̍t，自本咱儂是講「活物 ua̍h-mi̍h/mn̍gh」。若是外來新詞「植物 si̍t-bu̍t」，恐驚就無概念對應个台語在來詞，準做咱將「樹木」「花草」「五穀」攏總合起來，也無法度完整包含「植物」个範圍。

所以「植物 si̍t-bu̍t」即个詞對咱來講，真要緊。可惜袂少問題，歹剃頭：

「植物」正音是 si̍t-bu̍t。袂少中年儂有邊讀邊，唸做 ti̍t-bu̍t（佮「直物」仝音），閣愈濟中少年儂予華語帶衰，唸做 tsi̍t-bu̍t（佮「一物」仝音）。

但是台語講「植物 si̍t-bu̍t」正音，聽个儂容易誤解，重點毋是因為有真濟儂縒音唸做 ti̍t-bu̍t 甚至 tsi̍t-bu̍t，是因為會佮「食物 si̍t-bu̍t」分袂清。

唸文言音个「植物 si̍t-bu̍t」「食物 si̍t-bu̍t」攏是近代新詞，清朝時代1873廈英大辭典攏無收，到日本時代佇台灣个巴克禮牧師做補篇(1923)才收入去，1931台日大辭典即兩詞攏標明是「國」（指日文來个）。

「植物、食物」台語唸仝音，應用不便，可比「si̍t-bu̍t个成分」到底是「食物」抑是「植物」个成分？「遮个（這些）si̍t-bu̍t 攏會使做 si̍t-bu̍t」，第一个 si̍t-bu̍t 是「植物」、第二个 si̍t-bu̍t 是「食物」；「我食个 si̍t-bu̍t 攏是 si̍t-bu̍t，因為我無愛殺生食肉」，第一个是「食物」，第二个是「植物」。毋過，「有機 si̍t-bu̍t」有時是「有機食物」，有時是「有機植物」。

「食物」台語會使唸白話音「食物 tsia̍h-mi̍h/mn̍gh」，這是在來就有，兩款意思，一个做名詞，指 food、一个是指「食物件」。可惜指 food 个 tsia̍h-mi̍h 強欲廢去囉，咱也無可能叫儂mài講 si̍t-bu̍t，攏改講 tsia̍h-mi̍h，來佮「植物 si̍t-bu̍t」做分別。

「食物 tsia̍h-mi̍h」相關个台語舊詞閣有「食食 tsia̍h-si̍t」、「喙食物 tshuì-tsia̍h-mi̍h」、「日食 ji̍t-si̍t」。