欲批評教育部台語用字進前，請先參考「臺灣閩南語按呢寫」

教育部配合「臺灣閩南語推薦用字」另外推出「臺灣閩南語按呢寫」用字解析系列。

伊个內容，是用圖檔顯示，歹揣資料，各位若想欲了解採用迄寡台語字个道理，請連過去 http://twblg.dict.edu.tw/holodict/discuss_news_holo.html 下載。

但是，若欲完全看有伊个討論，汝愛有相當个台語語言學个智識，毋是凊彩儂，只要會曉講台語，寫華文个儂攏看有。當然，文字是欲予全民來使用，全民攏有權發表意見，但是汝若無下工夫研究過，閣實際試寫過長篇个台語文，干那倚靠「華語白話文」先入為主个觀念來批評台語用字，恐驚永遠無法度進行良性循環个深度對話。

有寡台文先進，完全無先參考教育部个用字解析，著講出真濟話來抗議，甚至譬相[phì-siùnn]台語文 學者所制定个台語字，按呢實在無夠理性。

若只是想欲寫台語文，當然無需要去了解制定用字背後个道理。親像欲寫華語文，並無需要研究「們、的、著、了、嗎」是按怎來个。問題是，想欲對台語用字發表意見，上好愛有相當个學識。