以下是末學大概整理一下，台灣民間說唱文學歌仔冊資料庫網站內底，《男愛女貪相褒歌》上本佮下本 標音个修改建議，也有提起一部份改字、註解个問題。
上本：
「小弟 含慢 人人 好」：「含慢」，標做 han-bān 應該照字直音 hâm-bān，一部份泉腔儂，包括呂柳仙，前字是變低調，若阮个第五聲是漳腔型變中調，hâm-bān 本調標第五聲，漳、泉腔攏有合。
「編歌 卜奉 念 迌𨑨」：「迌𨑨」標做 tshit-thô，改做 thit-thô 較合編者南港儂賴阿塗个腔。後文閣有出現幾若遍「迌𨑨」，攏應該改一下。
「共 汝 整 甲 金双双，袂須 富戶 好額人」：「金双双」標做 kim-sang-sang，這是第三句，賴阿塗有講究句尾平仄，伊第三句句尾規phō內底無用過平聲字，我憢疑著唸 kim-sáng-sáng，可惜兩種目前攏問無儂有咧講，無定論。
別葩个第三句尾字有表面看起來是平聲字，其實只是倚音借用，猶原著唸仄聲，像下冊有「煞買香水乎娘休」，「休」是唸 hiù，毋是 hiu；閣有「吹風即袂如蔥蔥」，「蔥」是唸 tsháng，毋是 tshang；閣有「通人卜看汝一橋」，「橋」是唸 kioh（本字「腳」），毋是 kiô。遮个字，網站攏有正確標音，我佇遮只是欲講「金双双」个「双双」扑算也是唸仄聲。 。
「汝 煞 氣嫌 大 玍泡」：「大玍泡」註解做「大陽囊」，應該是「大陰囊」，註解閣有寫著「今閩南人稱膀胱曰lān-pha」，「膀胱」應該改做「陰囊」。 網站是根據蔡培火《國語閩南語對照常用辭典》个解說寫做「陽囊」，但是兩岸个華語網路辭典並無「陽囊」即个詞，而且其他个台語辭典也攏解說 lān-pha 是「陰囊」。
「甲 君 廣笑 塊 閒幸」：「閒幸」標做 îng-hīng 是著，但是註解漢字變做「閒興」有問題，「興」字唸 hìng，毋是 hīng。即个詞台日典下冊p.79 有收兩種講法 ing-hīng 佮 îng-hīng，攏寫做「閒行」。
「听 娘 塊問 君 交代」：「代」 標做 tāi，即个口語詞表示「吩咐」之意，台灣聽著攏是講 kau-tài，漳腔區也是按呢，所以無適合標做 tāi，教典也是只收一音 kau-tài。
「恰久 恩情 都 識 哥」有兩句：「恩情」標做 in-tsîng，改做泉腔 un-tsîng 較好（本phō个標音體例並無使用南港老安溪腔个 irn 佮 ere，是寫 un 佮 ue ，甚至也無用著單央元音韻母 ir 佮 er，這攏拄好無影響著韻跤，所以我佇遮建議修改，也是採用六元音系統个新派泉腔爾爾）。
「那 行 咱 皆 看淡泊」、「叫 娘 別項 做淡泊」、「卜對 別項 買淡泊」：「看淡泊」標做 khuànn--tām-po̍h，四句連、唸歌个習慣無完全按照生活對話个輕聲規則，咱聽唸歌仙咧唸就知，像即種情形，怹會照普通變調來唸，所以毋免標輕聲。
「招 君 緊行 皆 看覓」：「看覓」出現七擺，攏標 khuànn-māi，改做 khuànn-bāi 較好，四句尾字攏是口元音韻母，押韻較媠，「覓」唸 bāi 也較合泉腔。
「閣 對 一宮 曰過來」：「曰過來」標做 uat--kè-lâi，uat 第四聲 著，「曰」字本音 ua̍t8，佇遮只是倚音借用，但是無需要輕聲記號，佮頂條仝款情形。
「也是 別項 恰 藕刀」、「百項 物件 成 藕刀」：「藕刀」標做 gió-toh，這是日語外來語，台語講法真濟變體，伊寫做「藕刀」應該唸 gió-to，毋是 toh。即个詞講 gió-to 个儂真濟，阮就是按呢講，而且伊這是第四句尾，採用平聲較好。
「我 愛 長衫 做 一領」：「長衫」有出現幾若遍，攏毋是指查埔儂个「長袍馬掛」迄種「長衫」，是指查某儂穿个「旗袍 kî-phàu」，無註解著，建議增補。
「我 娘 倚瓦 問 價數」：「倚瓦」標做 kiânn-uá，註解是「行倚」，應該是「徛倚 khiā-uá」較合。別句閣有出現幾若遍「倚」，攏是唸 khiā（徛）。
「身腰 五路 量 透透」、「台灣 五路 知透透」：兩句「五路」攏標做 gōo-lōo，應該是 ngóo-lōo。廈英典、台日典、新編華台語對照典 攏有收 ngóo-lōo，白話字教會公報也有出現過八篇文章有用著，但是攏無 gōo-lōo。
「免驚 乎人 笑 鷄孫」：「鷄孫」標做 ke-sun，改泉腔 kue-sun 較好。
「朋友 姉妹 那 問 阮」：「姉妹」標做 tsí-muē，改泉腔 tsí-bē 較好。
「那卜 細字 恁 着 無」：「細字」出現幾若遍，攏標做 sè-lī，改泉腔 suè-lī 較好。
「卜碟 別項 着 說明」：「說明」標做 sue-bîng，改泉腔 seh-bîng 較好。
「熱天 衫褲 都 也未，
等待 明年 三四月，
真情 个 話 共 君 說，
那是 卜 整 等 後回。」
即葩尾字攏標漳腔 buē、gue̍h、sueh、huê，改泉腔 bē、ge̍h、seh、hê 較好。「後回」有三腔 āu-huê、āu-hê、āu-hêr，台日典攏有收。（即葩四句尾字攏有漳泉差，並無定韻字。）
「明年 四月 念麼 到」：「四月」sì-gue̍h => sì-ge̍h，標輕聲也好。
「不通 細字 無 尾梢」：「尾梢」bué-sau => bé-sau。
「成煞 注文 即 英皆」：「成煞」標做 sūn-suà，而且改字做「順紲」，即个詞至少有三腔 sūn-suà、sīn-suà、sīng-suà，伊寫「成煞」就是 sīng-suà 个腔，字作「乘紲」，毋是「順紲」。
「買 來 皆穿 敢 下須」：「買」bé => bué
「無論 省款 我 都 肯」：「省」siá => siánn
「現時 高搭 真 流行」：「高搭」kuân-ta̍h => kuân-tah，借音字「搭」字直音 tah 就好，毋是倚音。像 kuân-tah-uê/ê，迄个 tah 多數儂變調是高降調，可見本調毋是 ta̍h8，是 tah4，即个第四聲个 tah 是名詞〔鞋跟〕之意，廈英典補編有收：”ba̍k-kia̍h-tah, the wooden heel of a woman's shoe.”。不而過，有儂講 kuân-tah-á（tah，仔前變調，變懸調），另外也有儂講 kuân-ta̍h-á（ta̍h，仔前變調，變中調），所以下一葩「皮鞋 那愛 恰 權踏」，「權踏」標做 kuân-ta̍h 就免改，即个 ta̍h8 佮 tah 無仝詞素，是指踏--起來真懸，但是無論 kuân-tah-á 抑是 kuân-ta̍h-á 攏是指〔高跟鞋〕。
「行路 不即 袂 凸泡」：「凸泡」phòng-pha => phòng-phā 常用詞，教典有收。而且這是第三句句尾，伊無用平聲。
「著者 恰 去 念麼 到」：「念麼」lian-mi => liâm-mi
「看着 無買 心 都 開」、「那愛 香粉 買 抹面」、「只久 皆買 也是 好」、「胭脂 水粉 買 了 後」、「看 有 卜買 也是 無」、「叫 娘 皆 買 二三双」、「襪仔 買了 閣再 看」、「襪仔 以經 買 清楚」、「買來 出門 卦 迌」、「卜買 目鏡 我 都 肯」、「卜買 金框 烏目鏡」、「目鏡 買了 看 打ク」、「倚程 得卜 買 皮包」、「卜買 雨傘 皆 看覓」、「綢仔 雨傘 買 了後」：
「買」 bé => bué
「大約 袂須 普道山」：「普道山」Phóo-tô-suann => 泉腔 Phóo-tôo-suann（普陀山）。
「穿着 甲 肉 真 相同」：「相同」標做 sio-kâng，註解漢字也改做「相仝」，即个詞講法真濟款，採用 sann-tâng，較合原用字。
「春手 落去 提起來」：「提起來」the̍h--khí--lâi => the̍h-khí-lâi，頭前有講著免輕聲，遮也是。
「店員 伊 有 回過來」：「回過來」huê--kè-lâi => hê-kè-lâi（「回」改泉腔、改普通變調）
「目鏡 買了 看 打ク」：網站引用黃英甫先生个解說：「可能是英語trunk，日音トランク(衣箱、手提箱之類)的略音。」劉建仁先生來賜教，提出另外一說，我看較好：
「打ク < phah4-kuh4 < パック < bag < handbag」，下一葩第一句就是寫「听娘廣卜買皮包」，意思佮劉前輩个語源分析完全符合。
「有 共 我 兄 說 透流」：「說」sueh => seh
「卜碟 省款 恰 麗斗」：「省」siá => siánn
「一款 排別 成 好看」：「排別」標做 pâi-lia̍t（註解漢字也誤改做「排列」）=> pâi-pia̍t。「排別」毋是錯版，本來就有「排別 pâi-pia̍t」即个詞，台日典下冊p.583有收，例句是「店頭排別去真好看」，完全符合本歌个用法。頭前也有出現一擺「看着 排別 真成 肴」音註攏著，到遮才失察覺。
「菊元 內面 賣 真巢」：「賣」bē => buē。
下本：
我發現下本較濟僫讀、僫解个所在，佇遮只列我較有把握--个，若是頂面有講過，漳泉差个小問題，像「買 bé => bué」、「說 sueh => seh」、「𨑨迌 tshit-thô => thit-thô」 、「尾 bué => bé」、「吹 tshue => tshe」，抑是輕聲調號迄款个，就無閣提起。我無把握个，也會批明「可能」即種無確定个字眼。
「叫 娘 汝 着 請 宿困」：「請」tsiánn => tshiánn（本字「且」，網站改字有正確）。
「二个𫔘好二元四」：「二元四」lī-khoo-sì => nn̄g-khoo-sì
「那有 缺欠 省 物件」：「缺欠」khuat-khiàm 改白話音 kheh-khiàm 較好，這是白話詞，台日典有收三腔 kheh-khiàm、kherh-khiàm、khueh-khiàm。
「想卜 招 君 來 別位」：「來」lai => lâi
「就者 菊元 皆 離開」：「離開」lî-khui => lī-khui，「離開」即个詞無分漳泉，前字攏是變低調，即字「離」著標第七聲才著，無論台日典、教台典，攏是標 lī-khui，毋是 lî-khui。
「叫 娘 汝 着 請 呈校」：「請」siánn => tshiánn（本字「且」，網站無改字）。
「即來 仝 我 小 開言」：「仝」標做 kā，應該改做 kāng，泉腔本來就有「kāng我」个講法，台語優勢腔講 kā guá，遮 著採用「kāng guá」較有合伊个用字。
「開錢 是 哥 个 方面，名聲 算來 感 上天」：「方面」標 hong-biān 無毋著，但是解說引用普閩典：「 就相對的或開列的幾個人或幾件事物之一說，叫方面。」即種解說佮華語文「方面」仝意思，佇遮較無鬥搭，應該著採用台日典下冊p.839「方面 hong-biān」第一義項：「體面[biān]、面子」較好。意思是哥仔汝開錢買物予我粧媠媠，汝真體面、真好名聲。
「汝 今 着閣 打 拔鍊， 只久 來 帶 正 當年」：「當年」標做 tng-liân，可能前字改做 tong，兩字攏文言音 tong-liân 較好。台日典有收 tng-nî（兩字攏話音）佮 tong-liân（兩字攏文音），無收 tng-liân（一白一文），伊 tong-liân 有兩个意思，一个是「適齡、當壯年」，例句是「二十歲正當年」；一个是像華語〔想當年〕个﹝當年﹞迄種意思。「只久來帶正tong-liân」會使解說做「有合今年个流行」佮「有合汝个年齡」。
「耳鈎 卜 打 蓮花 色」：「蓮花」lian-hue => liân-hue
「葵在 身軀 拭 目周」：「葵」標做 khē 毋著，著照字直音 kuî，伊寫「葵」是借音字，本字是「懷」，做動詞白話音唸 kuî。
「听 娘 嘴齒 小闊 呆，卜接 員公 也 月眉」：「員公」標做 înn-kong，註解漢字改做「圓公」，即个詞著唸 uân-kong，漢字寫法佇台灣歷史文獻是寫做「圓光」，現代建材業界有寫做「彎弓」，音其實毋著。教典有收【圓栱門 uân-kong-mn̂g】，彼是像城門迄種 ∩ 形个拱門，毋是像教台典个附圖迄種月洞門，內行儂早就反映，教典一直無改。
「司阜 監定 即下 知」：「監定」=>「鑑定」，註解著補一下。
「嘴仔 吻吻 笑未未」：「吻吻」標做 bûn-bûn，即个詞直音 bún-bún 就好矣，台日典下冊p.201有收「笑吻吻 tshiò-bún-bún」（又音 tshiò-bun-bun），新編華台語對照典有收「吻吻仔笑 bún-bún-á-tshiò」。
「甲 娘 參考 是 應當」：「參考」tsam-khó => tsham-khó
「雖 娘 意見 皆治 景」、「是 汝 皆治 听 無現」：「皆治」ka-tī => kai-tī，「自己」个意思有幾若種腔口 ka-tī / ka-kī / kai-tī / kai-kī。
「抹油 賴着 真正 巢」：「抹油」buat-iû => buah-iû
「二个 赶 甲 狂崩崩」：「狂崩崩」kông-phiànn-phiànn，著改 kông-phiann-phiann，而且這是佇第二句尾，用平聲才完美。台日典上p.507有收 kông-phiann-phiann，伊漢字寫「狂兵兵」。本冊寫「崩」字，是因為即字个文言音有唸 phing，伊家己閣「擬[gí]」出白話音 phiann。
「國際戲院 亦 世界」、「是 搬 歌仔 亦 電影」、「不是 精生 亦 禽獸」：「亦」標做 iah，改 ia̍h 較好。「抑或」之意，台語有兩種講法 iah 佮 ia̍h，借音字「亦」字是第八聲个字，配 ia̍h 較好。
「未來 風聲 着 知枝」、「未看 着有 聽 風聲」：「未」標做 buē，改做泉腔 bē 較好。這是「尚未」之意，漳 buē、泉 bē/bēr，佮「袂曉」个「袂」是漳 bē、泉 buē，無仝。
「來者 𨑨迌 無 得確」：「得確」tit-khak => tik-khak
「汝 煞 罵 我 拖屎連」：「罵」mē，改泉音 mā 較好。
「人才 生做 好漢 緣」：斷詞有問題，應該改做「人才 生做 好 漢緣」，「漢緣」是一个詞（台日典下p.528有收），意思是外貌予儂感受著个緣、吸引力，「漢緣」真好，就是「好 漢緣」，毋是「好漢」个「緣」。「人才」標做 jîn-tsâi 無妥當，佇遮應該唸 lâng-tsâi。台日典有收 jîn-tsâi 佮 lâng-tsâi 兩个詞，意思無仝，lâng-tsâi 是指品貌。小弟一再建議今後台語文 “lâng” 著寫「儂」，毋通閣寫「人」，就是蓋知影三不五時會拄著親像即種情形，研究者也會拂毋著去。
「君仔 廣話 成 九老，通人 知 汝 話 賢投， 拴扣 玍山 起來 罩， 騙 着 恁 娘[niû] 感有 賢？」：「九老」註解講：「語意難解，似有厚臉皮之意」，在我看，「九老」是「大老」个錯版，唸做 tuā-láu，《闽南方言大词典》p.79 有收 tuā-láu，寫做「大佬」，解說：「騙子一類的人」。佇遮應該是用做形容詞，真gâu欺騙儂个意思。但是杜建坊先生來回應賜教，主張講：
「九老」= kàu láu (kàu gâu/kàu khiàng)；廣話成九老 = 廣話成[到/夠]老。
kàu 寫做「九」，有兩个可能：變調型∣本調型。變調型是普通腔kàu→káu；本調型「九」讀 kau，是三邑泉；照南港腔是做變調型記法。
這我有略仔考慮著，但是閣感覺 tsiann5、kau3 兩个程度副詞做伙用个講法真礙虐，所以才放棄。另外，蕭藤村老師主張「九老」是「較鬧 kàu-lāu」，但是我看意思較袂合，即葩尾句是「騙著恁娘感有賢」，頭句「九老」解說做「大佬 tuā-láu」頭尾意思較呼應。
2018-04-09修正看法：
我今佇《新編勸世自嘆畑花修善歌》下本（玉珍漢書部昭和11年出版，冊名中个「畑花」是「烟花」个錯版）有看著：「看兄買物卽久老 會曉看圖卽有賢 我愛干漆三變透 樵風呌伊內外敲」。
其中第一句「九老」應該是佮男愛女貪相褒歌个「久老」仝一个詞，按呢「九」、「久」字著唸 kiú，毋是唸做 káu / kú。【九老 kiú-láu】 應該是「老練、láu-tàu/tâu」个意思。
「心肝 希望 那 甲愛，央人 共 汝 罩牽獅」：「那 甲愛」斷詞應該是「那甲 愛」，「央」標漳腔 iang，改泉腔 iong 較好。
「乾埔 對 伊 成 滿足，買 厝 謝神 即 結局」：即句無解說，意思毋是男主角對女主角感覺真滿足，是男主角滿足女主角个逐項要求，伊愛啥就買予伊。
Comments powered by Disqus.