正宗个台灣文學

欲用啥乜語言創作個人个文學，甚至欲用任何語言創作「台灣文學」攏是言論、表達个自由。但是只有直接使用台灣人民个語言來描寫台灣人民个生活，才是台灣文學个正宗。

因為種種因素，姑不將，只會曉使用「非人民个語言」來創作台灣文學个作者，面對台灣母語文學个興起，應該存[tshûn]一種心態－－雖然我一時無才調，但是彼是值得欣慕个理想。

母語文學个作者，面對規山坪个日文、華文台灣文學作品，嘛應該用心來吸收其中个精華。

雨落四山[hōo# lo̍h sì-suann]，終歸流入台灣文學青瓏瓏[ling-ling]个太平洋。