〈毋好講个代誌〉回應佮討論一

多謝遊子兄个回應。因為 xuite blog 將回應文个字體設了傷細，袂凍改閣卡大，所以我獨立貼一篇出來。我寫个佮遊子兄提起个例，平平是儂卡無愛聽著个話，毋閣拄好是顛倒ping2个情形。我講个情形，是話語卜講个代誌本身犯儂嫌，所以咱儂著想出一寡婉轉个講法。抑(iah4)遊子兄舉个例是迄个代誌本身是平常事，但是話語上用著別項物件來比並(phing7)，迄種別項物會予儂ge5--著。

以上無論是叨一種，研究伊个修辭法佮背後个語言文化有影不止有價值。但是佇語言个實際應用來講，無細膩袂用得。

第一種情形，前提若是有卜講著迄款代誌，用迄種婉个話正經袂bai2。總是，有一寡場合是連小可仔提起迄種代誌都無妥當，所以雖是婉轉話嘛袂使講。當然，即馬社會是愈來愈開放，愈無即種禁忌矣，毋閣我有個人个顧慮。

第二種情形个應用，共款愛考慮場合佮身份，做一个政府要員，用迄種話來比並，我認為會失格。phoo5 lan7-pha1即種意思，單獨一字是講 phoo5，兩字是講 phoo5-thann2，四字是講 phoo5-phoo5-thann2-thann2，愈儕字，口氣愈強。當然，是無 phoo5-lan7-pha1遐爾強，但是，咱講 「新加坡不時愛ka7中共phoo5-phoo5-thann2-thann2」按呢著有夠額來表達咱个憤慨，一方面閣保持咱个風度，卡袂落儂嘴唇皮(loh8-lang5-chui3-tun5-phue5)，mai3予國內外對台灣有敵意个儂閣踮遐生話，七hue5八hue5，共咱个訴求hue5甲霧去。

我知影我个想法傷保守，這是阮兜个家風。