民視新戲【龍飛鳳舞】

最近民視八點檔會換新戲【龍飛鳳舞】[Liông hui hōng bú]，故事个背景是 1868 年至 1888 年台北大稻埕。伊有推出一系列个預告片，真可惜，見擺報戲名攏講華語。

連古裝台語戲名【龍飛鳳舞】四字嘛無才調、無願意唸台語，尤其戲名是歸齣戲个五摠頭[gōo-tsáng-thâu]，做台語戲煞報華語名，心態上就是愛用【有氣勢】个華語來做【無夠力】个台語个頭，予台語成做華語个跤仔。

按呢到底是咧發揚台語文化，抑是咧傷害台語文化咧？怹只是咧利用台語最後一點仔收視價值，根本無關心台語運命，也無尊存[tsun-tshûn]台語儂起碼个尊嚴。

2000年年底，民視開演「飛龍在天」，轟動做一時，當時攏用台語報戲名，閣算有淡薄仔疼台語个心，經過十幾年，即个民視愈來愈墜落[tuī-lo̍h]，將台語工具化，利用台語來趁錢爾爾。

補充：【龍飛鳳舞】唸台語个時，四字攏用文言音，每一字攏本調，毋閣【鳳】若唸變調，成做【本調 + 本調 + 變調 + 本調】閣較順，這是真自然个台語節奏所形成个唸法。

雖然即四字个語詞結構是【主語 + 謂語；主語 + 謂語】个平行結構，但是第一組【龍 飛】唸較慢，兩字攏本調，予儂聽較清，到第二組【鳳舞】連調做伙唸，速度也配合予伊較緊一屑仔，按呢節奏愈媠。

另外閣有一个鋩角，就是唸文言个時，台語第七聲較無容易保持本調（即點不止幼路，台語界罕得聽儂提起）。