浸運泉（溫泉）

去浸運泉[ūn7-tsuânn]，拄著一个四五歲个細漢囡仔。伊攏講台語，真活骨，毋驚生份。離遠遠叫怹阿爸過來浸即池，水較燒。一下斟酌看，怹老爸是欲六十个儂矣，面帶笑容，真慈愛佮怹囝互動。囡仔閣對另外一頭擛手喝講："Come on, baby!“ 原來是怹老母，歹勢歹勢，伸指指[kí-tsáinn]比喙唇，教[kah]伊毋通遐大聲。

邊仔个 oo-jí-sáng、oo-bá-sáng 佮怹一家三个開講，oo-bá-sáng 笑講，【恁即个是加[ke]生个hōnn？】囡仔隨應講，【毋是偷生个哦！】囡仔个老爸講已經有一个孫仔佮即个囡仔平大，Oo-bá-sáng 講，【以早儂講 ta-ke 佮新婦同齊做月內】、【即个哪糖霜丸咧】。

後來，囡仔無看見老母，就講：【阮老母仔毋知走去taih？】Oo-bá-sáng 問伊講：【汝攏叫老母喔？】囡仔應講：【阿母--meh！】

哈，即个囡仔足𠢕[gâu]，會曉分別【背稱】（老母）佮【面稱】（阿母）。

註：【溫泉 un-tsuânn】阮南部屏東普遍是講 ūn-tsuânn，連東部海外个綠島嘛按呢講。前字變低調，並毋是【溫】字，本字我毋知，先借用【運】字，可能佮「牛仔咧 ūn-i̍k」个 ūn 有關涉，ūn-i̍k 是 kō-i̍k 个意思。