滾水罐

Tsiah久，哪塊學、哪塊寫軟體，無暝無日，儂thiám心肝燥(sò)。下晡佇食飯廳，moh滾水罐卜去灶跤添水，一時táng-hiánn，手滑去，lak lùe塗跤，tǹg一下歪phoé，座變形，內底電線看現現，驚會入水漏電，毋敢閣用。暗時走去全國電子買一kha新个，Sanyo 4.8 lip（liter, 公升kong-tsin），俗閣爻貯，毋知有tòng無？

即陣半暝，社區有儂來收糞埽，kánn是已經將我迄kha舊个車走矣。彼是卜倚二十年前我讀大學个時，佮一个共校，已經畢業、同鄉个學長 siāng徛內，我出錢，伊去買个，一直用到tann，若毋是我傷燥暴(sò-pō)，扑算閣十冬嘛用去。我用物(mi̍h)足省，一生至今，tsiah用第二个銀袋仔niâ。高中買个，真 實穿个外套閣塊穿。

即个李國銘學長，是阮迄tsūn个傳奇人物，佮我有寡奇妙个因緣，毋閣究竟無蓋儕往來（孤獨性[koo-ta̍k-siàng]个我佮任何儂攏算是無啥往來）。我對伊个瞭解tsiânn實有限。總講一句，伊聰明才智峘、藝術修養足、智識學問飽，閣為台灣文化實心塊付出。去法國留學挓博士，論文是寫台灣个平埔族。轉來台灣，當卜奉獻伊个才情，不幸先天个心臟病suah來發作，thuah無過三十九歲即關。

幾十年來我一直無佮伊連絡。頂日仔去參加羅馬字學術研討會，無意中tsiah聽著一个佇政大民族系塊教冊个學妹講起即層代。Tann卜佮伊連絡，即世儂是永遠無可能矣。

伊做代誌真急計[kip-kè]，咁是tī-tang時，塊狂啥麼，舊症頭tsuăn giâ 起來个？

台灣文化失去按呢个人才，實在可傷。

即篇無資格當做記念即位李學長个文章，只是phāu一个有寫卡贏無个心，sió記一下。

祈求伊往生到一个卡sù-sī、無病苦个世界，亦警醒家治愛好好仔活咧。