漢字台語文應該標記僫讀个輕聲

前言

我佇 2015 年 10 月 6 日有寫一篇〈漢字台文無必要標記輕聲？〉 來反對漢字台文完全無標記輕聲个落伍做法。今本文閣再舉例來主張 「漢字台語文應該標記僫讀个輕聲」。

正文

「有遐久仔」是特殊詞彙有特殊變調

今年全國語文賽台語朗讀稿，國中組第03篇是林炤慧老師个大作〈種花分人挽〉， 其中有一小段寫講：

我對阿婆印象上深的是有一回，一个生份人經過伊的花園，鼻著一陣迷倒人的花芳味。 彼个人目睭那巡手那雕樹仔椏，有遐久仔才去予伊 phián 著一蕊大大蕊的花， 彼就是轟動阮彼條巷仔的一欉花，叫做「五爪桃」。

看著「有遐久仔」我就開始替朗讀賽个指導老師佮選手煩惱矣，去掠真平音檔來聽， 果然是重耽个讀法：伊「有、遐」唸變調，「久」唸本調，「仔」唸輕聲。

就準「有、遐、久」攏變調，「仔」本調，也是毋著个。

私訊作者林老師確認，佳哉符合我所想个，著唸「有--遐-久-仔」 （ū--hiah-kú-á），「有」本調，「遐、久、仔」攏變低調輕聲。

這是台語特殊詞彙，「有」唸本調，就是強調「存在」一段相當个期間， 具體偌久，毋知。毋是咧強調「遐久仔」。

「有--一-睏-仔」佮「有--遐-久-仔」意思差不多。

欲講有一段相當个路途，也有講「ū--tsi̍t-tè-á」，像坐公共運輸欲去𬦰山， 半路佇車頂共朋友講：「欲到山跤閣有--一-塊-仔，我先 bî--一-下。」

「有--一-塊-仔」也用來形容儂好額。

這若毋捌聽過老大儂講，我想，五十歲以下个台語儂已經少儂會曉矣。 漢字台語文無標輕聲，對教、學雙方攏是折磨。

先父个話語巧妙个輕聲

我閣舉一个我佇家庭生活中聽著个例，若寫做漢字台文，閣無標輕聲， 我敢保證將來無幾个台灣儂讀會準：

阮侄仔細漢个時，有一暗，伊佇一樓欲上二樓个樓梯gám仔遐咧耍， 𪜶阿媽（就是阮má-á）叫伊起lih二樓睏，伊毋愛。阿媽欲閣叫， 𪜶阿公（就是阮pah-á）就講：
「伊愛踮遮，就予踮遮。」

各位讀者朋友啊，恁按怎唸頂段最後迄句總共八个漢字，而且「踮遮」重複兩遍个話？ 先父當時是按呢講：

I ài tiàm tsia, to̍h hōo tiàm--tsia.
（伊愛踮遮，就予踮--遮。）

第一个 tiàm 是變調、第一个 tsia 是本調；第二个 tiàm 是本調，第二个 tsia 是低調輕聲。

是按怎前後兩个「踮遮」，聲調本變个表現無仝？因為語義對照比較个焦點[tsiau-tiám]無仝：

第一个「踮遮」是強調所在个對比，「遮」（樓跤）佮「二樓」做對比，囡仔愛「遮」，無愛「遐」， 所以第一个「遮」是語義焦點，愛唸本調，第一个動詞「踮」就愛配合來唸變調。

第二个「踮遮」是強調動作「停留、踮」佮「移動、起去」个對比，囡仔愛停留佇原位， 無愛徙振動，語義焦點徙去動詞「踮」，所以第二个「踮」是唸本調，第二个「遮」就配合改做輕聲。

所以即句話換話來講就是：伊愛留踮「遮」（樓跤），無愛踮「遐」（樓頂）， 按呢就予伊「踮」--咧，毋通叫伊「起」--去。

先父瞬間講出即句奇巧个台語，我也即時注意著伊前後兩个「踮遮」聲調無仝， 也理解即句話个話意語理。但是我相信這若寫做漢字台文，閣無標輕聲， 將來世間就足少有儂唸會好勢。

結論

古早時代个漢文，像出版品、公文書、試卷，本身攏無咧加標點。讀者欲精讀一本冊个時， 才會攑紅銀朱筆（硃砂筆）佇冊裡个文句點圈點[khuân-tiám]。「正式文章愛包含標點符號」， 彼是現代才對西洋文字傳來个觀念，無仝个標點會影響一段文字讀出來个語意佮語氣。

台語文句當中唸輕聲、無輕聲，有足濟幼路个變化，毋是整理出一寡規則 學習者就有才調完全類推套用个，對母語已經嚴重流失个下一代來講，輕聲記號閣較有必要！

咱應該正視台語文个輕聲記號，共伊看做標點符號必要个成分在內！正式个漢字台語文章、 出版品，著愛完整標記輕聲（配合漢字台文个輕聲符號會使重設計，看著較袂遐礙目）。

一般日常應用台文，為著方便起見，驚儂會誤讀个所在才特別標一下就好。 像我寫網路台文，標輕聲是看必要性，無全部攏標出來，像句尾完成態助詞「矣」， 抑是句尾个語氣助詞佮持續態助詞「咧」，我通常就無佇頭前加雙連號。

帶酸khuì个文尾

像教典例句，因為有漢字佮完整台羅對照，所以漢字个所在無標記輕聲閣講會得過， 若是全國語文賽漢字台文朗讀稿，無標輕聲个做法，我是共伊看做是刁工欲刁難=儂=个。 增加指導老師「辨音、定調」个挑戰，袂使予𪜶 siunn 好 tsuán-tsia̍h， 也較方便甄別[tsin-piat]選手，來篩捒袂曉唸輕聲个選手。

（註：「刁難=儂=个」，其中个 = 號表示後壁字唸「隨前變調輕聲」，佇遮个實調是中平調輕聲。）