為著炒軍宅个代誌，王如玄怹翁「黃東焄」个名字即幾工定定出現佇政論節目。若無，扑算罕得有儂會曉唸「焄」个華語音 ㄒㄩㄣ，「焄」古文是「熏」个異體字；不而過，「焄」佇華語閣一音 ㄏㄨㄣ，是用做「葷」个異體字。 若台語「熏」、「葷」即兩字攏唸做 hun，佮「芬」仝音，所以「焄」也只有一音 hun。「黃東焄」台語著唸 N̂g Tong-hun，宜蘭腔講 Uînn Tong-hun。
（補充：素食，台語講「菜--个」；葷食，台語講「臊[tsho]--个」。）
不過，若是有咧寫漢字台語文个儂，就對「𤉙」（左火+右君）真熟，即字台語唸做 kûn，「火」字爿，正爿一个「君」，即款个形聲字，就是欲表示煮食个動詞「kûn湯」迄个 kûn，教育部台語辭典（教台典）解說：〔將食物放在水裡長時間熬煮〕。台語即字毋是有邊讀邊唸「君」第一聲，是將「𤉙」比照台語「裙」，唸第五聲 kûn。
照漢字个通例，像「峰、峯」、「群、羣」，形聲字即款「左右个組合」佮「上下个組合」，照講是異體字个關係，除非是寫儂名，著尊重當事人个選擇，袂使凊彩寫。
不過，「焄」佮「𤉙」就毋是異體字，因為一字是文言異體字；一字是閩台語舊文獻留落來个特用字，目前个教台典繼續沿用。
「焄」字電腦真好扑字、顯示，早佇 Big5 一萬三千外个中文字編碼个時代 就有收，編號是 46DF；後來也收佇 Unicode，編號 U+7104。
但是「𤉙」字 Big5 無收，Unicode 著到 3.1 版才收入 CJK 擴展 B 區用字，諸君个電腦系統若較舊，恐驚就看袂著。佇網路有袂少台語文資料用「焄」代替「𤉙」來用。教台典也將「焄」當做「𤉙」个異用字。
所以有台語文界个朋友看著王如玄怹翁个名，直接唸做 N̂g Tong-kûn，諒必是足想欲共即兩个儂掠去煠煠[sa̍h-sa̍h]、𤉙𤉙咧。
Comments powered by Disqus.