用白話音稱呼女性个偏名

家母正名單字「貞 tsing」，毋過伊做查某囡仔个時，怹兜个儂攏叫伊 Má-tsuh--á。má-tsuh 是日語名「松」个音，咱知影日本女姓真濟攏號做「松子 Matsuko」，阮媽媽是日本時代出世个，怹兜會用日語名叫伊，是真四常个代誌。我後來問伊，伊講細漢个時，咧做古物商个外公，佮一寡日本儂交情真好，其中一个日本儂共阮媽媽叫做 Má-tsú-khooh，逐家才綴咧叫。

伊嫁來阮兜了後，阮爸爸換叫伊 Kim-tshîng。細漢我聽著，攏袂曉將 má-tsuh 佮 Kim-tshîng 个音關聯起來，後來想著，極加[ki̍k-ke]是想著「金榕」，因為「榕樹」台語是叫做 tshîng-á。

我即幾工才致覺著，原來先父是欲叫「金松 Kim-tshîng」，「松」文言音是 siông，白話音就是 tshîng，佮「榕」白話音仝音。也就是伊佇戰後，無欲閣講日語名，寧可改叫台語，但是仝款保留「松」个意思。（毋過，伊猶原叫阮阿公 Oo-tooh-sàng。）

前一站仔，我聽著中部个前輩講，查埔儂號名「富」是唸 hù（hù 是文言音），若查某儂就著叫 pù--á（pù 是「富」个白話音，已經愈來愈無儂知）。漢字寫出來攏仝款，但是咧叫个時，查埔查某有分。迄陣我才知影台語有即種「利用仝一字个文白異讀來區分男女名字」个文化慣習。無疑悟，阮媽媽个偏名嘛有即種現象！

台語文白異讀个現象非常複雜，文言音定定用佇官方个、正式个、文雅个、精神个、抽象个意義；白話音定定用佇庶民个、私下个、土俗个、身體个、具體个意義。即種區別，甚至表現佇地位無仝个男女个名字頂面。

即種文化內涵，我若無一直咧關心、思考台語，永遠嘛袂明白！咱台灣豐富閣心適个語言文化，就按呢直透滅無去。