用跤頭趺想嘛知

台灣俗語：「用跤頭趺想嘛知」[iōng kha-thâu-u/hu siūnn mā tsai]。

意思是欲講，某一項代誌真簡單，毋免激頭腦去想，應該嘛知影。

但是，身軀頂个部位遮爾濟，是按怎刁致欲選用「跤頭趺」（膝蓋）即个部位來形容一條道理真簡單，無需要費神思考？是按怎無講「用尻脊骿去想嘛知」？也無講「用手後曲去想嘛知」？

因為咱儂个頭殼頂有幾若塊骨頭鬥成一个碗形个「頭殼碗」來保護頭腦（所以「頭腦」也叫做「頭殼碗髓 thâu-khak-uánn-tshué」）；若是跤頭趺，也有一塊碗形个骨頭，叫做「跤頭趺碗」，總--是，即个「跤頭趺碗」並無包頭腦。

所以台灣儂前輩若欲形容講一項毋免動腦去想个簡單代誌，才講「用跤頭趺想嘛知」。

另有，嘛有所在將「跤頭趺」直接叫做「跤頭碗」、「跤碗」。

閣有一句俗語講「問一个毋捌个，不如問我个跤頭趺」，佮頂面所解說个原理也相通。

以上是我用跤頭趺去想出來个，歡迎掠包。