「男人」台語講「查埔」，「女人」台語講「查某」

台語，男人叫做「查埔 tsa/ta-poo」，女人叫做「查某 tsa-bóo」。這漢字按怎寫？真濟古博先生，有濟濟主張，爭論袂煞，教育部目前攏無採用。教育部臺灣閩南語按呢寫第303期，主張講即對詞个詞頭 ta/tsa 是南方百越語，毋是漢語源，所以請毋免佇遮稽考漢字，先用借音字。

照講「查埔、查某」是無所謂好聽歹聽个中性用語，但是就實際个語用來論，只講「查某」兩字，有時會予儂嫌歹聽，我認為這主要是因為早年用「查某」來做「非良家婦女」个婉轉稱呼，包括「開查某」、「佇外口飼查某」，用久了後，「查某」煞污名化去，對通稱女性个用法，降級做「不良婦女」个代名詞，所以袂少儂避免只講即兩字。（「查埔查某」並稱無要緊，單獨講「查某」較容易犯嫌。）

親像毋通講「阿母，外口有一个查某講欲揣阿爸。」，按呢講，序大儂真有可能會感覺刺鑿。改講「阿母，外口有一个查某儂講欲揣阿爸。」加一音「儂」爾爾，就無問題。

通稱成年女性，若是較袂犯嫌个正台語講法，按照文雅度對普通到懸：

「查某--个、查某儂、婦人儂[hū-jîn-lâng]、姿娘[tsu-niû]/姿娘儂」。

「查某儂 tsa-bóo-lâng」生活中个講法有幾若種合音變體，有講 tsa-á-lâng、tsőo-lâng 等等，遮个日常講法就袂予儂嫌歹聽。

上雅氣个「姿娘」佇現代台灣日常社會，已經廢無--去矣，真濟儂台語儂學北京話講「小姐 sia̋u-tsê」。

補充：有面友提起，現代潮州話个發展無仝，「姿娘」取代「查某」，變做通稱女性个一般用語。