白冰冰「蓋高尚」

有一段時間，真時行一句台語「蓋高尚 kài ko-sióng」，這是白冰冰唱紅个一條歌名。白冰冰台語足 láu，對台灣諺語掌握了真深入，是我學習个對象。

伊捌出過一本冊《白冰冰講好話》（曹銘宗整理），勸儂著愛好心行[sim-hīng]、好喙水[tshuì-suí]。

但是伊後來主持節目，愈來愈無愛講台語，伊大概是認為台語只是佮鄉親父老跋感情个工具，但是猶原愛講華語，才會蓋高尚，爭取著閣卡濟觀眾。

台灣民眾卡熟似个，有袂少「天王級」个本土藝人其實嘛按呢。民間閣有足濟表演工作者，水準袂卡輸--怹，但是無機會出頭天。佇國民黨長期壓迫本土文化个歹環境，少少即幾个大腳[kioh]有才調佇主流媒體踏著地位，這佮怹倚靠國民黨政權，閣支持外來統治集團个價值觀、意識型態，有相當个連帶關係。

「尚」个廈門腔是 siōng，漳州腔是 siāng，唸做第二聲 sióng 是一種泉州腔。

若「象」--字閣愈複雜，有 sióng（泉）、siòng（另外一種泉腔）、siōng（廈）、tshiāng（漳）等等个呼音，彼毋是因為無仝意思、用法，才唸無仝音个「勾破」，只是腔口个差別。但是佇台灣因為「漳泉濫[Tsiang-Tsuân-lām]个演變難免會參差[tsham-tshi]，致使仝一个儂，欲講本來只有一音个仝一字，迄字若出現佇即个詞，伊會講某一種腔口个音；但是迄字若用佇別个詞，伊閣不知不覺選用別種腔。所以有真濟儂「無印象」講 bô ìn-sióng；但是「無對象」講 bô tuì-siòng，袂輸是勾破音。

黃俊雄布袋戲是偏漳腔，所以怹「象」定定唸 tshiāng。

「漳州」一律講 Tsiang-tsiu，袂使唸 Tsiong-tsiu，這是對漳州儂个尊𢙨[tshûn]，綴怹个腔唸怹个地名。無像「彰化」个「彰」會使唸 Tsiong 抑是 Tsiang。Tsiong 个音是泉州腔；Tsiang 是漳州腔。彰化海口普遍是泉州儂後代，內埔多數是漳州儂，互相尊重，「彰化」會用得講兩種音。

「泉州」一定愛唸 Tsuân-tsiu。佇遮，「泉」愛用文言音，袂使講卡捷用个白話音「泉水」个 tsuânn。

五十歲以下个台灣儂，「漳州、泉州」地名講會正个，真罕見矣。