白話字聖經个語法

巴克禮牧師白話字聖經（1916新約）个語法，不止簡捷[kán-tsia̍t]。舉一个印象深个例：「In lóng kóng, Tèng i si̍p-jī-kè」（怹攏講，釘伊十字架）（馬太27:22）

KJV 是："They all say unto him, Let him be crucified."

和合本是：「他們都說：把他釘十字架。」

白話字版上少字！後--來高陳白話字紅皮聖經（1972），就變卡倚咱即馬个語感：「kā i tèng si̍p-jī-kè」（共伊釘十字架）。

汝看按呢咁毋是佮和合本个華文語法掠齊？

針對即个例，我無把握巴牧師版究竟有合當時个廈門話語法--無。總--是，現代台語有一个大問題，毋知有幾儂智覺來對重[tuì-tiōng]？－－愈來愈囉黐[lo-thi]。棄捒家治本來卡捷[tsia̍t]个講法，改學華語卡煩个講法；煞閣保留家治本來比華語卡長个講法。咱通參考台文友志所寫來印證，怹佇網路發表台文，若有好意附完整華譯个，差不多逐篇攏是台文比華譯卡長。

附記：有朋友唸我頂面即篇短文，愛我共伊聽看佗位有問題。我个答覆包括以下个說明：

「幾儂」个「儂」、「愈來愈…」个「來」攏唸本調卡好。

其實，咧讀台語古文也好，咧朗讀台語白話文也好，我認為攏無應該照日常生活口語个變調規則按呢，絕大部份个字攏唸變調。有真濟時陣唸本調顛倒卡自然、嘛卡好理解吸收。一寡台語文老師傷過頭強調愛照日常對話个變調規則，究真是怹研究了無透，台語个複雜、多層次，毋是怹所想个遐爾簡單，掠一寡「普遍个現象」整理出規則，就欲掠即種規則來蓋[kài]倒一切情形。

可比「台文友志」个「文」，「完整華譯」个「整」，若我來唸，嘛攏會唸本調。按呢汝唸著會卡輕鬆，別儂嘛聽卡有。