祭孔个時，掠真牛來掣[tshuah]智慧毛，真無智慧

最近才看著「舊聞」－－台南市祭孔典禮，掠真正个牛來掣毛[tshuah mn̂g]，號做「拔智慧毛」，這是真酷刑、無仁慈心、虐待性命个代誌，予儂真不目[put-bo̍k]。

（2023-05-28註：本來我有kah圖，tann想講無必要予圖中个儂像永遠出現佇網路， 願怹會得智覺著即種代誌蓋殘忍，毋通閣做。）

我聯想著一條故典，記錄佇論語：

孔子个學生子貢捌建議講，既然咱个國君已經無閣逐個月初一，照起工去祖廟祭拜，來行「告朔」个禮，按呢就勿閣刣羊，排咧八仙桌頂答應故事矣。孔子無贊同，應講「汝毋甘迄隻羊仔，我毋甘迄套禮數」。

以咱文明時代，愛護動物个眼光來看，子貢才是著个。向望倚靠虛文、形式來予後世勉強閣知影古禮，佮古早時代諸侯敬重天子、謹慎治國个精神，即種「癡情」，一旦愛用殺害動物來做代價，咱極加只有同情，但是袂凍認同。

掠活牛來掣毛，講會得著智慧，閣較是愚癡[gû-tshi]、不智个迷信儀式。

音註：

一、行告朔个禮[kiânn kò-sok ê lé]：「告朔」是天子佇頂一年交秋个時，頒發明年个曆書予諸侯。隔轉年，諸侯逐個月初一，著愛刣羊去祖廟祭拜，了後才照曆書聽政治國。

二、答應故事[tap-ìng# kòo-sū]：只存形式，佇咧應付一向个慣例，也就是「虛應故事」。

三、孔子應答个原文：「爾愛其羊，我愛其禮」[ní ài kî iông, ngóo ài kî lé]。「愛」是「毋甘、可惜」个意思。