穿皮鞋

今仔日去學校面試，按照我往過[íng-kuè]去公司引頭路个做法，穿痕衫[hûn-sam]，結領帶[kat niá-tuà]，西裝褲下[hē]一雙皮鞋。

古早儂言[giân]，「鞋襪著跤[tioh-kha]，kánn是卜去叫儂阿爸(a-pa)」，注意迄个「著」是第四聲，變調是高降調，佇遮是【穿著(於)】个意思，即句話反映出迄陣生活困苦，囡仔一直到少年儂素常攏褪赤跤。等到有襪仔鞋仔通穿，嘛穿出來外口个時，大概著是卜去相親矣。

勿講古早，連我讀國校仔，阮迄班蓋儕查甫囡仔嘛是赤跤來讀冊。姻身體真勇，有一个誠大漢个同學，歸年thàng天攏穿短褲，讀到五六年，有一擺大寒[kuânn]，伊才穿khah-khih褲來學校，迄領長褲tsīng買來，毋知佇布櫥內囥幾年矣，伊穿起來褲跤拄仔到跤頭hu卡落去一sut仔，毋知按呢咁有算是khòng-pat-á褲無？

轉來講我穿皮鞋个過去，我歸半世儂，攏盡量穿步鞋，卡無愛穿皮鞋。感覺皮鞋歹行走，對跤个保護嘛bái。近年來，即種慣勢愈卡強。一雙運動鞋穿甲鞋底hiauh一半矣，才去買新个。佇一坎大間鞋店，為著卜揣一雙有合[ha̍h]跤，又閣毋是皮面个運動鞋，揣歸晡。

我即个kok-pih儂个想法，就是我若穿真皮做个鞋，感覺對彼善良古錐，煞予儂破腹liû腸、剝皮liô肉，苦慘來死个牛仔、羊仔袂過心。會記得細漢，卜買假皮做个皮鞋，敢哪四界有。即馬毋知按怎，煞差不多逐雙鞋攏貼紙印講是正皮个。Hiàng時个運動鞋嘛攏是布面个，即陣變做皮个卡儕。

我今仔日穿个即雙米色个大頭鞋，算是休閒鞋[hiu-hân-ê]个額。買來歸年毋捌穿。本來亦無按算卜買，是我歸省个時陣，阮老母毋甘我，無先共我講，著去鞋店kuānn一雙轉來叫我試穿，我試了無拄好大雙，挓轉去換別雙。庄跤个老鞋店，賣一寡俗貨，看tioh應該是假皮做个。配烏phú色个西裝褲，sông-sông，按呢亦好。