簡單解說台語「青盲牛」佮「家婆」（毋是「雞婆」）个音義佮漢字

「文盲 bûn-bông」台語口語講「青盲牛」（推薦用字700字用例有收）。

這是用具體个 "blind ox/cow" 來比喻「文盲」，是台語非常心適、傳神个話語。明明是儂，但是因為毋捌字（無受教育），著袂輸失明、行無路，永遠著做牛做馬予儂差使[tshe-sái]，袂凍出頭天个可憐个牛共款。

有朋友想講，gû 咁是「愚」--字。「青盲牛」廈門腔、泉州腔是 tshinn-mî-gû，漳州腔是 tshenn-mê-gû，第三字攏唸做 gû，無可能是「愚」--字，因為「愚」个漳腔是 gî，泉腔是 gîr，只有廈門腔、新派泉腔，才唸做 gû。

欲決定妥當个台語漢字，愛有腔口比較个概念。親像「家婆 ke-pô」（「管家婆 kuán-ke-pô」簡稱做「家婆」，用來形容無事揣事个儂），戰後以來長期攏寫做「雞婆」，這絕對錯誤，毋但意思袂通，發音嘛袂通。因為「雞」泉腔唸做 kue，但是泉腔猶原講 ke-pô，毋是 kue-pô，可見毋是「雞」--字。

另外亦有台語先進主張愛寫做「枷婆 kê-pô」，這嘛表示伊無腔口比較个觀念。第五聲个「枷」轉調變第七聲，是漳州才按呢，泉腔是變第三聲，問題是泉腔講 ke-pô，第一字嘛是變第七聲，可見即字一定毋是第五聲變來个，絕對是本調第一聲个字。

---

「盲」--字，有唸做 bîng 个音。我無愛採用，因為佮「明 bîng」共音，歹用。「文盲」佮「文明」共音；「問道於盲」佮「問道於明 būn tō î bîng」共音，蓋毋好。