素食品做甲親像魚、肉

素食做甲親像魚、肉个模樣，蓋濟儂批評講，食菜心肝無清，無路用。請用另外一个角度考慮，即種做法著是佛法所講个「善巧方便」[siān-kháu hong-piān]－－辦桌个主家為欲吸引遐个一時無法度斷油臊[tsho]个多數儂，漸漸改來食素，毋才設計出即種料理，予怹食了會愛食，減少殺生，按呢咁毋是嘛值得肯定？

話講倒轉，阮食全素幾十年，攏盡量食天然个食材，卡無愛食即種過度加工个素料，因為咱毋知伊製造个過程，彼[he]內底難免有對健康不利个成分。另外，糋路[tsìnn-lōo]个，嘛愛避免。總是，出外儂袂凍傷過揀食[kíng-tsia̍h]。

台灣扑算是全世界食素上蓋利便、好命个所在。啥乜好食、營養个素食都[to]有儂研究開發出來。素食个人口扑算亦是世界一堵[it-tóo]个。但是，到今[tann]，食菜儂猶原是社會个少數，佮親儂做伙生活亦好，出外佮儂接接[tsih-tsiap]交陪亦好，有種種个無方便。因為我堅持食素，實在予我身軀邊个儂足麻煩，一方面我感覺對怹足歹勢，一方面我嘛深深感謝怹。

因為按呢，我過去攏足歹勢勸儂食素。但是後來我感覺按呢毋著，因為食素是少數儂，當然會予家治佮別儂卡麻煩，但是若相信食素本身是正確个做法，著愛來鼓舞社會，予素食者變成多數儂，按呢情勢毋是著顛倒反[píng]矣？

當然，咱是民主社會，儂个選擇愛尊重，袂用得強迫。目前社會个共識，只是毋通無代無誌虐待[gi̍k-thāi]動物。

問題是，咱現在食个肉，攏是對大量生產肉品个飼豬場、雞場、牛場來个，其實遐个環境對動物攏是足大个折磨[tsiat-buâ]。在我看來，著是虐待。