紩衫（縫衣）个一條台灣俗語

昨昏暗台文讀冊會，朱同學講細漢个時，伊衫穿佇身軀頂，媽媽直接幫伊補紩[póo-thīnn]个時，攏會哪唸講：「穿咧紩[thīnn]，穿咧放[pàng]，罵阮是賊仔毋是儂」。

阮屏東敢哪無即種風俗，即句話我捌聽過別个中部个朋友講過，伊第二句嘛是講「穿咧放」。毋閣，這扑算是走音去矣，應該是「穿咧紩，穿咧縫[pâng]，罵阮是賊仔毋是儂」[tshīng leh thīnn, tshīng leh pâng, mē gún/guán sī tsha̍t-á m̄-sī lâng]。

按呢唸，意思卡合情境（因為並無「放」啥乜），而且 pâng 佮 lâng 才有完全鬥句。總是，為啥乜會予儂賴做是賊？我毋知。請教各位伊个典故。

比較起來，「紩」卡細針，上捷聽著；「縫」卡大針，定定用佇「縫衫仔裾[sann-á-ki]」。台語另外有講「挓 tioh」（有腔口講 tiò），是正式欲紩以前，暫時用針線大概紩一下，通[thang]試穿看有合軀[su]無。親像衫个內裡[lāi-lí]，嘛定定愛先tioh起來。台語个日用動詞非常精密。

褲跤、手䘼箍通常攏有「拗裒 áu-pôo」（台灣華語講「打褶」），拗一裒，共伊縫起來，叫做「縫裒 pâng-pôo」。長度若無夠，欲改卡長，著愛「放裒 pàng-pôo」，兩个詞，音有差。